Ka Thomas Jones Synod College Jowai lyngba ka chat History ynne ka sngi da pynman ko yei pynsñiawthooh wa kyrpang hajrong ka phang “Of Culture Globalisation, Subcultures and Social Change: The Case of Northeast”.
Ka thong hi toh yow pynsñiawthooh ya ki khynnah heiyatoh i rukom pyrkhat, rukom im wei khamtam i saam kylliang yei tip i chemphang ha kylleiñ ka pyrthai wei kammon i kylla ka pyrthai ktah ko yei rukom im waka dustur riti.
U Prof. Shobhan N Lamare naka Department of History ka NEHU kam u bru chemphang ha kani ka yalang da ong u wa i rukom pyrkhat u bru wow kylli ya iwa boon jait da wanrah ko yei kylla ha ka imlang sahlang yow lai chakhmat hei rukom im katkam wa kylla ki por yow lait u man kiwa sahdien tangwa ym toh deiwa ieh mylliñ ya ka riti dustur manda joor i ya bood yong kiwi.
Da ong u leh wa em kiwa pyrkhat wa i ya bood yei yong pyrthai namo ka Globalisation man ko kam kawi na ki rukom chah hiar thma khamtam ha ki ri wa mahajon kiwa da yoh myntoi na ka khayi pateiñ wa katni ka juk.
Ha kiwi won da chim ki wa kani ka Globalisation toh kawa bha kawa pyndooh pyndam yei khanglaad wow ya e kylliang yei stat wei man ko kawa yoh myntoi bha wei hawa jia kamni manda wan kini ki bor wa na baar hap hi i wow pyrkhat ya ka dustur riti, wei da em leh sa iwi i rukom pyrkhat wa ym ye u khanglaad ya ini waroh neibhah da yah i por wei daw ktah ko hi ya waroh ha waroh ki liang.
Haka yalang wa pynlai da u W.E.H. Lamin, Asst. Prof, Dept. of History da yoh i klam pdiang naka A. Thma, Head of Department History, katwa i klam e khublei da yoh naka L.E. Langstang Asst. Prof, Dept of History.
