theme-sticky-logo-alt
theme-logo-alt
Advertisement ad1
Advertisement ad1

Rah ka Violet Talang ya ka Business Startup u Wailadmiki deilang wa ka poisa T. 2 lak

Advertisement ad1

Haka e sikai seiñ khih namo ka Business Startup kawa 45 sngi neibynta ki khynroo khyllood kawa da kyrchaan poisa da u Wailadmiki Shylla, MLA ka Jowai Constituency, ka Violet Rose Talang da yoh rah ko yaka song poisa wa T. 2 lak deiwa jop ko yaka yakob Top-5 Business Plan Presentation namo ki 5 ngut kiwa biang dooh ki buit seiñ khih wa da pynman ynne ka sngi ha Chutwakhu Indoor Sport Hall, Jowai kawa man leh ka sngi pynkut ya kani ka e sikai.

Ka jiat khih wa ka Violet da tyrwa ko wow sdang toh wow ri ngap, wow pynmih umngap kamjooh wow pynlai yaw yei umngap hapoh i pyrtuid Vio’s Golden Drop.

Advertisement ad1

Ha kani ka e sikai da em kamwa 60 ngut kiwa chah sikai, wei kam ka dak u pynchlur nadooh wa sdang leh u MLA Wailadmiki Shylla da kular u wow e T. 2 lak ya kiwa ye u lehbha haka yakob wow pynyoo ya ka khih wa kwah ki u seiñ namo ka Business Plan ka wow man kam ka laad yarap ya ki hei wow sdang ki yei iwon iwon i khih wa ki angnood ki.

Haka yalang pynkut ynne ka sngi da sakhi lang u Dr. W.R. Kharlukhi, MP Rajya Sabha, u Thombor Shiwat, CEM JHADC, ki MDC ka JHADC, u P.K. Boro ADC ka West Jaiñtia Hills, ki sahep na ki chnat krehkaam waphær wa kynthup naki Bank, kiwa sikai, ki waheh chnong wa kiwi.

Ki khynnah wada pyndep ya kani ka e sikai leh khana ki wa man sakhiat i myntoi ya ki neibhah boon i wym jooh tip næ johkhe ki nachwa leh lyngba i chah sikai won da tip ki boonjait iwa yatoh hei wow seiñkhih næ wow yieñ hei yong ki hi i kjat wa kynthup leh nadooh i rukom pynlai yaaw wa kiwi.

Kiwa e yei klam ha kani ka sngi nadooh u Dr. W.R. Kharlukhi, u Thombor Shiwat wa kiwi da yaroh ki hajrong i yoo jngai u Wailadmiki Shylla wow wanrah kam kani ka e sikai wa rap phær neibynta i myntoi ki khynroo khyllood ha kam kini ki sngi wa saja i yoh kreh sorkar.

U Dr. Kharlukhi hawa pynchlur ya waroh kiwa da pyndep yei chah sikai, da e nongmuna u ya uwa seiñ ka Ambani Company ha India wa heipor wa wan u cha India kam u Refugee em u du T. 25 wei lyngba kani sdang khih u hadooh wa man uwa heh spah tam ha India wa haka pyrthai. Kamtæ yooluti u wa i sdang khih yong ki deiwa yoh yarap poisa lyngba ki chnat sorkar leh u man iwa pynmyntoi bha ya ki.

Neiliang u Wailadmiki Shylla leh hawa e yei klam yooluti u wa waroh kiwa da pyndep ya kani ka chah e sikai u sdang noh ki wow leh ya iyi re iyi kam kitæ kiwa seiñkhih wow e khih leh ya kiwi.

Pynbna u leh wa daw pteiñ biang u ya kani ka e sikai, tangwa du ya ki bru hapoh ka Constituency yong oo wymtoh de kam ini wa dep, wei haka kynti wa ar daw pynboon u ya kiwa jop.

Ong haroh u wa daw pynman u sei e sikai ya ki wym em lai puræ puthi kam hei sikai yah JCB, sikai ah sñiooh wa kiwi kiwi neibhah kam kini ki khih leh man iwa dawa wei yoh nong hi.

Heijooh i por pyntip u leh wa neidaw i wan ka khlam, i stat i tip ki khynnah leh da chynna wa hiar ko heiwa ki khynnah wa chong Class-X leh yoo kam kiwa chong Class-VIII, kamtæ rai haroh u wow pynman ya ka Free Coaching ya ki khynnah Class-X hapoh ka Constituency u khamtam ya ki khynnah wa wan naki yung wa dooh wa duk.

Khnang yow ye u pynmankaam yeini i angnood waroh khut u i yakrehlang ki paidbah dei wow e bor e mynsiem wei kyrchaan ya oo haki por wa chakhmat.

Share this:
Previous

Hanla e bor ka aiñ, ym myntoi wow em ki BSF chadooh Amlarem: JSU

Next

Pynman ka TJSC ya ka yaphyllu yei ktah i bood yei yong kiwi ya ka dustur riti