Hadien wa yut ki 6 ngut ki koidi na District Jail Jowai, u Director General of Police (DGP) ka jylla, u Dr. Lajja Ram Bishnoi da ong u wa da phah lai sylli u ha ki heh pulit cha kani ka patok wei da chem wa ki CCTV kiwa da pyndait ha kani ka patok ym em u krehkaam ki.
Da ong u wa ha i jia wa nyngkong uwi u koidi da lait u wow yut na patok ha Jowai, wei hadien wa da yoh kem biang ya oo da kyrriah noh ya oo cha ka patok wa em ha Williamnagar. Da ong u wa ka sien wa ar wa ki koidi da yut ki toh ki 6 ngut kiwa kynthup ya u I Love You Talang, heiwa 4 ngut da chah bom yap ki ha ki paidbah katwa 2 ngut won da yoh u kem biang ya ki.
U DGP da ong u leh wa neiliang ki pulit da pynkhlan ki ya i sonteri hei sngi wei miet ha kani ka patok heiwa da phah booh leh ya ki light ha ki kattu katni ki bynta wow lait na kam ini i jia.
Chooh chooh da ong u wa da phah ya u IG (Prison) wow lai pait ya waroh ki District Jail kiwa em ha ka jylla, wei hadien wa e kti ya ka bui, ka chnat leh daw pyrkhat ko wow pynbiang yeiwa emkaam.
