theme-sticky-logo-alt
theme-logo-alt
Advertisement ad1
Advertisement ad1

Ha ki soo bnai chah kem 134 ngut kiwa khayi drug, 61 ngut kiwa tooh thuk-thuk wa ka poisa wa T.18 klur

Advertisement ad1

U Director General of Police (DGP) ka jylla, u Dr. Lajja Ram Bishnoi da ong u wa ki pulit ka jylla ha ki soo bnai wa dadep da yoh khyrrup ki hadooh 3.062 kilo i drug Heroin, 4500 kilo u bhang, 150 gram i drug Cocaine, 145 klong i dawai ky’oh wa kamjooh ki kuli dih pynmuaid.

U heh pulit ka jylla da ong u leh wa ha kini ki soo bnai wa kynreh ki pulit da yoh leh u khyrrup hadooh T. 18.33 klur ka poisa.

Advertisement ad1

Da ong u wa hajrong i khyrrup drugs, ki pulit da ksoh ki leh 31 tylli ki kari, kiwa kynthup 4 tylli ki truck, 90 tylli ki Mobile Phone wa ki tiar pynmynsoo wei ka poisa wa da kem na kiwa khayi drugs man ko T. 24.22 lak.

Ki pulit da Register ki 48 tytlli ki Case hajrong i khyrrup drugs, wei da kem 134 ngut ki bru wa suba emkti, na kini 125 ngut toh ki chynrang wa 9 ngut ki kynthai wa sanphaw ngut kiwa hapoh 18 snem. Da ong u wa na ki 134 ngut, 123 ngut toh kiwa na Meghalaya katwa 11 ngut kiwa na ka Assam, Manipur, wa Arunachal Pradesh. Chooh chooh da ong u wa na kiwa chah kem, 5 ngut toh kiwa da jooh chah kem teiñ wei ki pulit da pynkhreh ki u pynngat ya ki ha ki kyndon wa khor yong ka Narcotic Drugs and Psychotropic Substances (NDPS), Act.

U DGP Bishnoi da ong u wa hadooh katni ki pulit da Register ki 48 tylli ki Case, heiwa chiteiñ na ki toh ha Shillong, East Khasi Hills, bood sa ka Tura, West Garo Hills, ka Khliehriat, East Jaiñtia Hills, ka Ri-Bhoi wa West Jaiñtia Hills.

Ha iwi i liang u DGP da ong u leh wa ki pulit ha ki soo bnai da kynreh ki ya kiwa tooh thuk-thuk heiwa boon na kiwa chah tooh toh na Tura wa Shillong, heiwa da ong u wa ki pulit da yoh ki wow khyrrup 141 tylli ki thuk-thuk wa da chah tooh wei da kem leh ya ki 61 ngut ki bru heiwa da Register leh 19 tylli ki Case.

Heiyatoh wa i chah kem ki khynnah wa dang khian hajrong i pynemkaam drug, u DGP da pynsñiaw u yei sñiawkhia wei da ong u wa ki pulit da phah ki ya kini ki khynnah cha ki thaw yasyllok.

Hawa kylli, u Dr. Bishnoi da ong u wa ha ki kajiak sngi wow wan ki pulit daw noh daw pynsih noh ki ya ki drug wa da khyrrup.

Share this:
Previous

Hadien wa yut ki 6 ngut, chem wym em krehkaam ki CCTV ha District Jail Jowai

Next

Da e kti ki pulit ya ka bui cha ka sorkar yei chah pynbaad thied kari u GK Iangrai