Ka NSS Unit ka North Eastern Hill University ynnin ka sngi da lehkmen ko ya ka lyngkhooh snem wa 53 wa sdang namo ka Foundation Day ka NSS ha ka yalang wa pynman ha Multi-Use Convention Hall, NEHU, Shillong heiwa u Dr. W R Kharlukhi, MP Rajya Sabha da embynta lang u kam u kongsan.
U Dr. Kharlukhi hawa e yei klam da pynsñiaw u yei kmen wow embynta lang ha kani ka sngi neibhah oo leh jooh man u kam u dkhot ka NSS heipor wa dang lai College u. Da e khublei u leh ya ka NSS yei kaam wa da leh ko yow yarap ya ki bru ha kiwa boon ki liang.
Da klam u leh yei wym yoh kreh ki khynroo kiwa da pyndep yei puræ puthi hapoh ka jylla deiwa pynchlur leh ya ki wym toh u dooh mynsien ki tangwa wow man ki kam kiwa seiñ kreh ym toh kam kiwa thooh kreh yow ki leh wow e kreh ya kiwi.
Da e khublei u leh ya ki Unit ka NSS kiwa da wan na kylleiñ ka jylla yow embynta lang ha kani ka sngi deiwa pyn-eh daw ya ki neibynta ka mynried yong ki.
Ha kani ka sngi da saam leh ya ka University Level NSS Award cha ku Unit ki College, ki Programme Officer wa ki Volunteer kam chibynta wow tipmit yei kaam wa da leh ki neibynta ka imlang sahlang neibynta u snem 2022-2023.
Kiwa yoh ya kani ka khusnaam man ki kamni:
Best NSS Volunteers- Ka Naphisaroi Kharbuli, NSS Unit, NEHU, Shillong, ka Kerdarilin Khongwir, Lady Keane College, Shillong, u Armstrong Lyngdoh, Ri-Bhoi College, Nongpoh, u Suklang Paul Kurbah, NSS Unit, NEHU, Shillong wa u Pyndemlang Lyting, Shillong College, Shillong.
Best NSS Programme Officers- Ka Iasuklang Kharumnuid, St Mary’s College, Shillong waka Yomica V Syiemlieh, Ri-Bhoi College, Nongpoh.
Yei naam Best NSS Unit da yoh ka Ri-Bhoi College, Nongpoh.
Kiwi de kiwa emlang ha kani ka sngi toh u Dr. M M Khymdeit, Programme Coordinator, NSS, NEHU, u F. Rumnong, State NSS Officer, Meghalaya wa u Prof. P S Shukla, Vice-Chancellor, NEHU, Shillong wa kiwi de.
