U Montri Rangbah ka Meghalaya, u Conrad K. Sangma ynnin ka sngi da booh u ya u mooyurim wow chna ya ka yung krehkaam wa thymme ka Chokpot Sub-Division ha South Garo Hills yow pynmankaam yeiwa angnood ki paidbah.
U Conrad da booh u leh ya u mooyurim yow chna ya u sarok na 12 Mile ha i bynta u sarok Tura-Dalu yow lai cha Chokpot uwa jrong 35 Km yow chna pynmiat, pynheh wei wow siang psiang.
Hawa e yei klam, u Conrad da ong u wa sñiawkmen u wow ye u e ya ini cha ki paidbah ka Chokpot kiwa da dawa ya ini da slem.
Ya uni u sarok da booh poisa kawa jan dap T. 50 klur katwa T. 4 klur neibynta ka yung krehkaam wa thymme ka Sub-Division.
Da ong u wa i kaam pynroi ym toh du neibynta ka Shillong wa Tura tangwa toh u poi i cha ki thaw wa em cha kdong cha chmiang leh deiwa ong wa 80% na kiwa chong chnong toh em ki ha ki thaw wa em cha palatsor kamtæ hap man salonsar i e yei pynroi.
Chooh chooh da ong u wa man iwa sñiawsih wa ka Chokpot toh kawa da chah ieh bieñ la 50 snem wei ka sorkar yong oo u pait ko ya waroh iwa emkaam ki.
Heiyatoh wa u sarok wow chna da ong u wa uni daw man u uwi na uwa bha dooh u sarok u wow ye u nujor wa ki sarokbah.
Ha ka 23 tarik, u Conrad da booh u leh ya u mooyurim ka yung krehkaam wa thymme ka Raksamgre Civil Sub-Division, West Garo Hills hei dor wa T. 4 klur hi. Wei da wai u leh ya ar tylli ki yung skur wa thymme hapoh ka Raksamgre Civil Sub-Division kiwa da chna hapoh ka Asian Development Bank kam chibynta ka Human Capital Development Projects ha Meghalaya. Kini ki skur toh ka Pedaldoba Govt Aided Secondary School waka Raksamgre Higher Secondary School.
