U Montri wa pait ya ka chnat Kaam Pohyung ka jylla, u Lahkmen Rymbui da ong u wa ka bui (Report) kawa da paan hawa yatoh wa i kawang bomb pynjhia khmat ya kiwa sikai Contract wa pynman yakhih ym pu em poi ko hadooh katni.
“Ka bui wa nga da paan O na ki bor District hawa yatoh wa i kawang bomb pynjhia khmat iwa da jia hawa yakhih kiwa sikai Contract hadooh katni ym pu poi cha nga,” da ong u Lahkmen hawa yaklam wa kiwa thoh khubor ynne ka sngi.
U Montri da ong u wa ya kani ka bui da paan nadooh ka 7 tarik na ki bor District, tangwa hadooh katni ym pu em yoh ya ka, kamtæ ya katni ym pu ye wow ong lane u chim ki laad pynchitom hajrong ini.
“Manda yoh ya kani ka bui, daw pait O ya iwa emkaam u leh wei ya kawa daw leh u man ko hei rukom wa biang, wei daw man bait thij katkam ka aiñ,” da ong u Rymbui.
Kam wow pynkynmoo wa neiliang ka seiñ HITO da maham ko wow pynman dei lai toor cha Secretariat yow pyrchah hajrong i pynslem yong ka sorkar wow pynchitom wei wow beh kreh chipor (Suspend) ya ki pulit kiwa emkti wow kawang bomb pynjhia khmat cha kiwa sikai.
Hawa yatoh wa ini, neiliang u Rymbui da ong u wa ka sorkar ym yada ko ya uwon uwon lane wow murieh ya iyi iyi wei kamtæ chwa wow leh ya iyi iyi hap lai katkam ki kyndon yong ka aiñ.
