U James PK Sangma uwa man kam u Montri ka chnat i chait i khiah wei u Montri warim ka chnat bordiñ da ong u wa ka Inquiry Committee wa khlieh da u Judge wa da chong ngiah ka High Court ym em chem ko iyi iyi iwa phær heiyatoh wa ka Smart Meter Project.
Kam wow pynkynmoo wa uwa e ktien ka All India Trinamool Congress, u Saket Gokhale ha ka 11 tarik da thoh chithi u cha u James yow kylli yei pyndait ya ki Meter wa da chna hapoh China uwa da pyndait leh ha yung sah u James ha u 2021 hanla u Symbood Montri Rangbah, u Prestone Tynsong da ong u ha u Naiynñiaw uni u snem wa kini ki Smart Meter ym pu em yoh ki ya ka Renewable Energy Certificates (REC) wa i tipmit na ka sorkar India.
“Nga ym tip O wa lada u Gokhale tip u chaphang ka Inquiry Committee kawa da thung da ka sorkar wa da khlieh da u Judge wa da chong ngiah ka High Court. Wei ka bui (Report) kani ka Inquiry Committee ym em ong ko wa em iyi leh wa phær heiyatoh wa ka Smart Meter Project,” da ong u James.
Da ong u leh wa u Gokhale hap u wow kreh kot bha heiyatoh wa ini yow man u uwa da biang i tip wa iyi wa da leh ka sorkar.
Chooh chooh da ong u wa wow pynbaad man ko iwa suk tangwa toh u em i kitkhlieh wym toh u yah bakla ya ki paidbah du neidaw wym bien u thooh bniah wei da pynsepai u yei por yong waroh deiwa wanrah ya kini ki pynbaad.
Heiyatoh wa i pynbaad u Gokhale wa ka NPP ym em phah ko ya ka bait pynlut Election namo ka Election Expenditure cha ka Election Commission of India neibynta u snem 2018, u James da ong u wa ka Party tip hi ko iyi wa toh u leh ko wei u leh ya waroh.
“Nga da sñiaw phylla O ya ini i klam u Gokhale uwa sai na la-ær ya waroh ini,” da ong u James.
Puræ leh: Ha yung u James Sangma da pyndait nyngkong ya u Smart Meter
