Ka All India Congress Committee (AICC) da pynman ko yei jied ya u President wa thymme yong ka Party ynne ka sngi, wei ya kani ka Election da chimbynta wow jied da palat 9000 ngut ki wakreh ka Party ha ka ri waroh kawi.
Ya kani ka Election da pynman ha waroh ki Pradesh Committee wa kamjooh ha Meghalaya da pynman ha Congress Bhavan, Shillong.
Ki ar ngut kiwa yahkhmat ka Congress kiwa yakhun neibynta ka chuki President toh u Shashi Tharoor wa u Malikarjun Kharge wei ya uwa jop daw pynbna ha ka 19 tarik uni u bnai.
Hawa yatoh wa kiwa jied na jylla, u President ka Meghalaya Pradesh Congress Committee (MPCC), u Vincent H Pala da ong u wa ya ka Election da pynlai da ki Returning Officer wa da phah na Delhi wei i jied man ko kawa lai bait wei kiwa jied na ka Meghalaya Congress da em ki 54 ngut.
Da ong u wa waroh ar ngut ki kyrtong toh kiwa biang bha wei man ki leh kiwa yahkhmat ka Party wei da yoh u wow ya krehlang wa waroh 2 ngut kam ki MP.
