U Symbood Montri Rangbah ka jylla, u Prestone Tynsong uwa man leh u Chairman ka High Level Committee wow kyrriah ya ki bru wa sah ha Them Metor, da ong u wa ka Harijan Panchayat Committee (HPC) ympu e ktien ko hadooh katni hajrong i pynwadur næ ka Blueprint yong ki thaw sah wa da pynkhreh da ka sorkar.
Ka sorkar jylla hadien wa da dep pynkhreh ko ya ka ‘Blueprint’ ya i thaw wa thymme wow kyrriah ya ki bru wa sah ha Them Metor, Them Iewmawlong da dep ko wow khut yei yalang yow pynsñiaw yeini.
Ha kani ka yalang wa da emlang kiwa yahkhmat ka Harijan Panchayat Committee (HPC) ha ka 29 tarik u Naikhynde da batai ya ki pynkhreh wa ka sorkar da pynbiang ko tangwa hadooh katni ki bru na ini i thaw ympu phah ktien ki wot hadien wa mih ka hukum ka kasari.
