Kiwa yap hadien wa tkut wei haap ka yingkieñ doi-doi kawa em ha chnong Morbi, Gujarat ynnin ka sngi da poi ki cha 141 ngut, kiwa da ye wow pynlait im da em ki 177 ngut katwa kiwa dang chah sumaar da em ki 19 ngut.
Ini i chnong toh iwa jngai kamwa 200 Km na Ahmedabad wei kani ka yingkieñ toh kawa da chna nadooh ki por ki pharæng wei da khang ya ka la 6 bnai yow pynchna thymme heiwa da wai biang ya ka ha ka tayaw wa dep.
Ha ini i por wa jia da em kiwa wan lai ke kiwa wan lehkmen ya ka Chhath Puja heiwa da em boon bha ki bru ha kani ka yingkieñ wa jrong 230 meter heipor kamwa 6:40 i miet ynnin ka sngi Bibar.
Da antaad wa da em kamwa 500 ngut ki bru ha kani ka yingkieñ heipor wa jia ini wa kynthup ya ki kynthai wa ki khynnah heiwa i bor kani ka yingkieñ toh wow kyrchaan ya kamwa 125 ngut dohi iwa da pynman ya kani ka yingkieñ wow tkut syndon ko.
Da wan wow yarap yow sai ya kiwa yap da ki bru ka NDRF wa ki bru ka NDFR kiwa da kreh waroh chi miet.
Neiliang ka sorkar Gujarat da pynbna ko ya ka poisa yarap kawa T. 4 lak cha kiwa ha-yung kiwa yap wa T. 50,000 cha kitu kiwa mynsoo. Neiliang won u Prime Minister ka ri, u Narendra Modi da pynbna u ya ka poisa yarap kawa T. 2 lak cha kiwa ha-yung kiwa khlaad.
