Ka KSU Laban Circle ynne ka sngi da lai yachem ko wa ka Ripnar Lyngdoh, Commissioner & Secretary ka General Administrative Department (GAD) wei heijooh i por da lai booh dorkhat ha u Sniawbhalang Dhar, u Montri ka chnat GAD hajrong i pynslem ka sorkar wow pynkylla pyrtuid ya ka sarok Zig-Zag Road wa em ha ka Dorbar Chnong Kenches Trace, Oxford, Rilbong (KOR) cha ka Hoping Stone Lyngdoh Road.
Ka seiñ da ong ko wa ha u snem 2019 da em i thmu wow pynkylla pyrtuid ya kani ka sarok cha ka Ardhendhu Choudhary Road khlem da tip wei yoh mynjur yong ka Dorbar Chnong KOR wa kiwa chong chnong tangwa hadien wa da yieñ pyrchah ka seiñ wa ka Dorbar Chnong KOR da yoh wow pynsangeh ya ini i thmu wei ki paidbah yong ka chnong KOR da rai ki wow pynskem ya utai u sarok hei pyrtuid u Hoping Stone Lyngdoh wei da phah leh yei thoh cha ki bor wa pait.
Tangwa hadooh katni ym em da yoo ya ki dak ki chin wa ka sorkar daw leh ko ya ini i thrang ki paidbah wei da pynlyngngoh wa ka Cabinet ka sorkar lyngba ka State Naming Authorities ha u 27 tarik u Naiynru, 2022 da pynkylla pyrtuid ko sa ya kawi ka sarok wa em ha Dorbar Chnong Laban cha ka Bhaskar Choudhary Road, wei ini da pynchrai ko ya ka seiñ waroh kawi hawa ka sorkar u pynsahnaam ko yei pyrtuid ki sarok wa ki thaw hei pyrtuid ki bru wym toh ki jaitbru ri-loom.
Kamtæ ka seiñ da ong ko wa lada em i thmu wow pynkylla pyrtuid toh u pynman da ka Public Hearing yow lait nei kynrum kynram.
