Ka Meghalaya da sdang ko ya ka 2nd North East Olympic Games ha ka yalehbol dei jop da 6-1 yaka Sikkim ha ka U-21 Men’s Group 2 ha madan ka MFA, Third Ground, Polo ynne ka sngi.
U Dajiedlang Wanshnong da yoh u ya ka Hat-Trick (23′, 32′, 53′) ya ka Meghalaya, katwa u Substitute, u Wadajied Kynsai Ryngkhlem da yoh u ar kool (90’+3, 90’+4) wa u Oresterwell Langshiang chi kool (90’+5) heiwa ki le kool toh kiwa da thap chwa u kut wot ka yalehke. Ya ka chi kool ka Sikkim da thap da u Swarneem Gurung ha ka minit wa 66.
Ha chwa kani ka yalehke, ka Nagaland da jop ko ya ka Arunachal Pradesh da 2-0 katwa ka Manipur da jop ko ya ka Assam da 3-0. Ka Meghalaya waka Sikkim da man ki leh kiwa nyngkong wow yalehke deiwa pynche ya ki bordiñ kiwa da pyndait kyrpang neibynta kani ka lympung.
Mynstep daw sdang da ka yalehke ki kynthai ka U-17 heiwa ka Manipur daw yachem ko waka Assam heipor 11:00 waje i step ha ka Group 1 wei daw pynbood da ka Mizoram waka Meghalaya heipor 3:30 i sngi ha ka Group 2.
