U President ka Federation of Khasi Jaintia and Garo People (FKJGP), u Dundee C Khongsit da ong u wa i chah khut hajir yong kiwa yahkhmat ki ym toh de kawa sñiawphylla, tangwa nei wym chimkhia yong ki sorkar kiwa da lai wa kiwa wan leh, neiliang ka seiñ hawa chim ya ka phang kawa ktah ya ka yap ka im ki khynroo khyllood hakhmat dooh, daw pynbor ya ka sorkar wow chna ya ki Policy neibynta ki khynroo.
Da ong u wa ka seiñ ym toh kawa pyrkhat du chipor ar por hajrong kani ka phang, tangwa toh ka phang kawa da slem wei ka seiñ da pynbna ko leh da ka Socio Economic Reform Movement (SERM) ha u snem 2017, wei lyngba kani ka Movement da chem yei eh ki khynroo wei i thmu wa da pynman ya ka lai paidbah ha ka 28 tarik leh man ko wow e rynsan ya ki khynroo wow pynsñiaw yei eh nei wym biang i kaam i jaam.
Kam wow kdaw wa ka FKJGP ha ka 28 tarik u Naichiphaw da pynman ko yei lai paidbah deilang wa ki khynroo wa dooh kreh tangwa ha kani ka lai paidbah da mih i huri hura nei chah dat ki bru kiwa lai wa wan.
Hawa kylli hajrong i chah kem ki dkhot ka seiñ, uwa yahkhmat ka FKJGP da ong u wa em ki dkhot kiwa pait yei lai ryntih ka Rally kiwa da chah kem hajrong itai I jia, wei da ong u wa i chah kem yong ki toh i sñiaw sarong neibynta i daw bah ki khynroo wei da pynrap wa ini man i i sñiawsarong leh yei em ki khynroo kiwa da ym pyrkhat de yei yong ki neibynta ki paradoh parasnaam.
Hawa yatoh wa i pynkrehkaam ya ka Section 144 CrPC hadien ka Rally yong ka FKJGP, u Dundee da ong u wa ka sorkar ye ko wow leh yei kaamraam wow pynneh yei suk i saaiñ, tangwa lada i por dawa i, lada em mynkna i pynrkhiñ lyngba ka kyndon 144 CrPC leh ka seiñ daw lai ko chakhmat.
