Ka Manipur da lehbha ko ha ka yalehke Wushu wa Taekwondo ha ka 2nd North East Olympic Games 2022 ynnin ka sngi.
Ha Wushu wa da pynman ha NEHU Campus, ha ki chynrang da yoh takma ksiar ha ka Taolu da u Salam Marshal Singh na Manipur, u Tonmoy Boro na Assam da yoh takma rupa u katwa u Kyrshanbor R Songthiang na Meghalaya wa u Pongchoi Reham na Arunachal Pradesh da yoh takma tama ki.
Ha ki yong kynthai ha ka Taolu da yoh takma ksiar da ka Yumlembam Echangtombi Devi na Manipur, ka Yani Eru na Arunachal da yoh takma rupa ko katwa ya ka takma tama da yoh lang da ka Espiranza S Songthiang na Meghalaya waka Nistha Dutta na Assam.
Ha ka Assam Rifles Indoor Stadium, Laitkor wa pynman ya ka Taekwondo, ka Manipur da yoh takma ksiar ko ha ka kynrdan Junior Girls’ ha ka yalehke Kyorugi ha ka U-42kg, U-44kg, U-46kg wa U-55kg kiwa da yoh da ka Martin Wahengbam, ka Irom Bijaya Devi, ka Priyadarshini Mayengbam waka Salam Charlei Devi. Ka Assam da yoh ko ar tylli ki takma ksiar lyngba ka Anshika Singh (U-49kg) waka Nayatri Chetia (U-52kg).
Ha ka Junior Boys’ Kyorugi won da yoh takma ksiar ka Nagaland iwi lyngba u Tenloi Phom (U-45kg); ka Assam da yoh ko ar tylli lyngba u Debasis Chetia (U-48kg) wa u Rahul Phukan (U-51kg); ka Manipur iwi lyngba ua Arubam Kishan Singh (U-55kg); ka Mizoram iwi lyngba ka Lalremmuana (U-59kg); waka Arunachal Pradesh lyngba u Nared Jomoh (U-63kg).
Daw pynkut ya ki yalehke Taekwondo wa Wushu myntu wei daw sdang won da ka Judo ha Laban SC Indoor Stadium myntu katwa ka Karate won mynstep ha SAI Training Centre, NEHU.
