Lai pait u Conrad ya ka ktem ki CRPF ha Mawlai, dang yang jubab na ka MHA yow kyrriah noh

U Montri Rangbah ka jylla, u Conrad Kongal Sangma, ynne da lai pait wei da yachem u ya ki heh ka CRPF ha ka ktem wa em ha Mawlai Nongkwar chwa wow kyrriah noh ya ki na ini i thaw kamwa kwah ki paidbah ka Mawlai.

Ha kani ka sngi da synraan lang u MDC ka Mawlai, u Teiborlang Pathaw ki rangbah chnong ka Mawlai Town Dorbar, kamjooh ki heh pulit kam u Director General of Police (DGP), u Dr. LR Bishnoi, ka IG yong ki CRPF ka Sonal V Mishra, u Home Secretary ka jylla, u CV Diengdoh, ka Deputy Commissioner wa u Superintendent of Police ka East Khasi Hills ki heh pulit wa kiwi kiwi.

Hawa klam ynne ka sngi, u Conrad da pyntip u wa i kyrriah ya ki CRPF da em i hapoh ka Ministry of Home Affairs (MHA) ka sorkar India ka wow e mynjur chwa wow e kti ya i thaw wei ini daw chimpor i kajiak tangwa daw pyrchang wow pynsmat katwa ye. 

Da ong u wa i kyrriah ya ki CRPF na ini i thaw daw wanrah myntoilang i ya ka sorkar wa ki CRPF kamjooh ya ki paidbah ka chnong Mawlai, wei da khana u wa ka sorkar da pynkhreh ko wow kyrriah noh ya ki CRPF cha New Shillong Township ha Mawdiangdiang marjan wa i thaw wa da booh ya ka Secretariat wa thymme ha i thaw wa heh kamwa 250 Acre.

Related posts

Hadien chi sngi wa wai chah khang ka khyrdop ka KHADC

May 20, 2025

Deiwa khut ka ISI lai u Gaurav Gogoi cha Pakistan: Himanta

May 18, 2025

Da ong u wa i wan ki CRPF ha ini i thaw 44 snem nachwa wow yakhun ya ki kaam kieñsuloi wei da hap wow pynman thaw sah ha ini i thaw iwa man i yong ka chnat Arts and Culture hadooh katni neibhah ym em yoh thaw chwai. Da ong u wa neidaw i em slem neh ka ktem ki CRPF da mih i sñiawkhia na ki paidbah ka thaaiñ, tangwa hadien wa da yaklam wa kiwa yahkhmat ka chnong wa u MDC kamjooh chirup wa ki pulit wa ki CRPF da rai wow thooh ki laad wow kyrriah noh ya ki cha iwi tawon i thaw. 

U Conrad da ong u wa neidaw wa kani ka thaw toh i yong ka chnat Arts and Culture wei kawa em leh ya ka Amphitheatre wei ka sorkar thmu ko wow pynman ya ki kaam wow kyntu kynrong ya ki khynroo wa em sap wow yoh laad ki wow kreh. 

Ha ini i lai u Conrad da yoh leh ya i pynsñiaw na ka IG yong ki CRPF wa na u MDC kamjooh na ki heh ka Mawlai Town Dorbar.

Ha kani ka sngi u Montri Rangbah ryngkat u MDC da lai pait ki leh ya ka Amphitheatre heiwa da kular u wow thooh laad kammon wow pynthymme wei wow pynmiat biang ya ka khnang wow myntoi ki paidbah wa chong chnong. 

U Conrad ha kani ka sngi da lai pait u ya ka thaw paitke namo ka View Point yong ka kchaaid Bishop wa Bedon’s Falls kawa em ha Nongkwar, wei da yachem u leh ya kiwa pynlai ya ka Mawlai Presbyterian College wow tipmit noh kam ka People’s College.