Kam chibynta wow pynneh pynsah ya ka riti ka dustur ka jylla, u Montri Rangbah, u Conrad Sangma da wan wai paidbah u ya ka Shillong International Centre for Performing Arts & Culture (SICPAC) hapoh ka chnat Arts & Culture kawa em ha Mawkasiang ynne ka sngi hei emlang u Symbood Montri Rangbah, u Prestone Tyngsong, u Montri ka chnat Arts & Culture, u Sanbor Shullai, u Chief Secretary ka sorkar jylla u Donald P Wahlang, u Commissioner & Secretary, Arts & Culture u Frederick Roy Kharkongor wa kiwi de.
Ini i thaw toh iwa nyngkong ha ka jylla hawa nujor ya i rukom chna wei pynwan dur neibhah deiwa em ka SICPAC, daw man kaam ko ya i thrang yong kiwa boon ki khynroo khyllood ka jylla wa em yei sap.
Ha kani ka SICPAC ye wow yoo yei chna wa skem wa paka, wa pynyoosuk chooh chooh ya i em ki thaw paitke wa ki Hall nadooh kiwa heh wa kiwa khian wa boonjait, kam ka Multipurpose Theatre kawa ye wow pdiang hadooh 1739 ngut ki bru, i thaw paitke wa 302 tylli ki chuki, ka Black Box Theatre wa 574 tylli ki chuki, wa ka Open-Air Theatre neibynta 15,000 ngut kiwa wan paitke, iwa ye wow riñ rap boon ya kiwa wan paitke na kylleiñ. Ya ini i yung da chna ha i lut wa T. 151.33 klur dei yoh yarap wa T. 136.20 klur na ka Central Non-Lapsable Central Pool of Resources (NLCPR) wa da pynlait da ka DoNER, katwa T. 15.13 klur won na ka jylla.
Hawa klam ha kani ka sngi, u Conrad da ong u wa ka SICPAC daw wanrah ko yei tipmit wa kyrpang ha ka ri wa ha ka pyrthai heiyatoh wa ka Performing Arts. I em kani ka thaw daw wailaad i leh ya ki khynroo khyllood ka jylla kiwa em ki sap. Kam ka International Convention Centre kawa em ha jylla, kani daw wanrah ko chiboon i myntoi ya ki khynroo ka thaaiñ mihsngi wa em sap kam ha ka Arts, Music, Films wa Multimedia wei daw booh leh ya ka Museum ka wow pynyoo rong ya ki riti dustur yong ka jylla.
Ha ka SICPAC daw em leh ka Art Gallery, ka Sky Theatre, ka Special Exhibitions Space, thaw chong ki VIP, ka Auditorium wa i thaw paitke wa skit talawiar, ka VIP Banquet Hall, ka VIP Lounge, ka VIP Rest Room, ka Tribal Museum, ka Media Centre, Television & AV Studio, ka Library, ka Food Court wa kiwi kiwi.
Ya Meghalaya Government Construction Corporation Ltd wa da thung kam ka PMC (Project Management Consultant) wa M/s. Hindustan Steelworks Construction Ltd (ka Project ka sorkar India), M/S NCC Limited wa ka M/s Skematic Consultants kiwa man kiwa emkti wow pynman ya ini i thaw kamwa man i katni.
