U Montri ka chnat Kaam Pohyung ka jylla, u Lahkmen Rymbui ynne hawa lai hiar yow pait yeiwa jia ha Mukroh, West Jaiñtia Hills District heiwa da dooh yei mynsien ki 6 ngut ki bru wa kynthup ya 5 ngut kiwa na chnong Mukroh wa uwi u Forest Guard ka Assam, da pyntip u wa daw wai noh ya ka Police Outpost ha Barato, ha Kyrshai wa ha Malangkona kawa da dep u wow mynjur.
Da pyntip u wa ka sorkar nadooh u Naiynru 2020 da dep chong yalang ko heiyatoh wa ini kamjooh leh neibynta wow pynbait ya u pood u ang wei kamjooh leh wow e yada ya kiwa chong chnong, kamtæ ha ka 25 tarik uni u bnai daw wai ya ka Police Outpost ha Barato yow yoh yei chngaaiñ ki bru wa em ha khappood.
Da ong u wa i pynbait pood lai ko deiwi hi tangwa iwa emkaam toh u em i chngaaiñ ya kiwa chong chnong wei wym toh de u jia kam ini i jooh.
Kamtæ neiliang ka sorkar daw wai ko yaka Barato Outpost kawa daw em hapoh yong ka 20 tylli ki chnong kani ka thaaiñ.
