Ka Central Executive Committee yong ka United Democratic Party (UDP) kawa da man ynne ka sngi da sangeh noh ko yei pynbna ya ki kyrtong ha ka thup kawa nyngkong, wei kani ka rai toh hadien i jia wa sñiawsih iwa da jia ynne i step ha chnong Mukroh, West Jaiñtia Hills District heiwa 5 ngut kiwa chong chnong ka Mukroh wa uwi u pulit Forest Guard ka Assam da khlaad noh ki hei chah siat yap ha ki pulit ka Assam deilang wa ki Forest Guard wei da em leh kiwa mynsoo.
Hawa klam haka yalang yong ka CEC, u President ka UDP, u Metbah Lyngdoh da khana u wa da kyntu ya u Montri Rangbah wow phah takit ha ka National Investigation Agency (NIA) hajrong itai i jia.
Kam i dak yong i sñiawsih wa i sñiawlem ya ki mynsien wa da khlaad wa kamjooh ya kiwa chong chnong ka Mukroh, neiliang ka UDP da pynman ki yei suki kiaw.
U Metbah da ong u wa neidaw wa ini i jia wa sñiawsih, neiliang ka UDP da chim ko ya ka rai wow dam chwa wow pynbna kyrtong kat hadooh wa da pyntip da kamwi won.
Neiliang u President ka UDP da phah u leh yei sñiawlem cha kiwa ha-yung ha-sem yong kitu kiwa da khlaad noh ha itai i chah siat ha ki pulit ka Assam.
