U National General Secretary ka Bharatiya Janata Party (BJP), u Rituraj Sharma da dawa u wa u Montri Kaam Pohyung ka Meghalaya, u Lahkmen Rymbui wow hiar chuki noh nei kaam wa ksoh lada u sñiawsarom u yeiwa jia ha ka chnong Mukroh.
Heijooh i por won uni uwa yahkhmat ka BJP da kyrpaad u ya ka sorkar Assam wa synchaar da ka BJP hapoh i yahkhmat u Himanta Biswa Sarma kam u Montri Rangbah wow beh kreh ya kiwon kiwon kiwa emkti lada chem ka Judicial Inquiry. Da pynbaad u leh wa toh neidaw wym biang i rukom krehkaam ki pulit Meghalaya iwa da pynman wow poi chei dooh mynsien bru.
Uni u heh ka BJP da lai u cha chnong Mukroh ha ka 27 tarik uni u bnai deiwa synraan lang leh da kiwa yakhmat ka BJP Meghalaya, wa kynthup ya u AL Hek, u Sanbor Shullai wa u Ernest Mawrie najrong u MLA ka thaaiñ, u Nujorki Sungoh.
Ha ini i lai cha Mukroh, neiliang ka BJP da e yarap ko leh cha ki manyung kiwa da maad yeiwa sñiawsih ha ka 22 tarik uni u bnai.
