Ynne ka sngi haka yalang chwa wow thang ya i dur bula yong ki le ngut kiwa kynthup ya u Montri Rangbah ka jylla u Conrad Sangma, u Montri Rangbah ka Assam, u Himanta Biswa Sarma wa u Montri ki Kaam Pohyung ka ri, u Amit Shah heiyatoh wa i chah siat yap ki san ngut kiwa chong chnong ka Mukroh haka 22 tarik uni u bnai, da em ka yalang heiwa ki seiñ hapoh ka Save Hynñiewtrep Mission (SHM) da dawa ki wow kem noh ya kiwa emkti wow siat yap ya ki san ngut ha Mukroh.
Neiliang u President ka JSM, u Lengingstar Rymbai da ong u wa ka sorkar ymtoh u su du ya ka bai lutsan (Compensation) tangwa da dawa u wa ka sorkar toh u thung kreh ko ya uwi næ kawi na kiwa ha-yung yong kiwa da dooh yei mynsien.
U Leningstar da beiñ u ya i tlot ka sorkar jylla wa i thombor ka sorkar Assam heiwa ki pulit ka Assam da hiar ki chapoh chnong Mukroh wow siat yap ya ki san tylli ki mynsien.
Da ong u wa ka sorkar jylla da toh u pynkup burom (Award) ko ya ki puit ka Assam kiwa da nood wow pynemkaam da i buit wow siat yap ya ki san ngut neibhah lada kyruiñ cha ki pulit ka Meghalaya nood ki wow siat yap du ya u bru wa thiah kjut hapyrdi i chitom wa joor.
Da kynmoo u yeiwa jia ha khappood neipor cheipor heiwa ha u 2014-15 da siat ki wot ya u DSP ka jylla ha Psiar wei ini man i kam i tynjooh bor wa ki pulit ka Meghalaya.
U Leningstar da ong u leh wa ka jylla da toh u thung kreh pulit noh ko ya waroh kiwa chong wa sah ha khappood khnang wow ye ki wow yada pyn yaki daki hi.
