Hajrong i thoh u Tuliram Ronghang, CEM ka Karbi Anglong Autonomous Council (KAAC) haka rynsan Social Media hawa lai hiar u cha ka chnong Mukroh deiwa ong wa ym e chi inchi leh cha kiwa chong chnong pyrchah ya ka aiñ (Illegal Settlers) ha ki khappood ka Karbi Anglong.
Hajrong ini, ynne neiliang ka Save Hynniewtrep Mission (SHM) wa kynthup yaka HYC, HANM, JSM, EJNC wa CORP da lai yachem ki ya u CEM ka Jaiñtia Hills Autonomous District Council, u Thombor Shiwat wow leh u iyi iyi hajrong ini i klam u CEM ka KAAC uwa da klam khlem da tip yaka yurim wa sakhiat wot hawa ka chnong Mukroh toh kawa dang haap hapoh u pood u ang ka jylla Meghalaya lyngba ki kot ki sla wa da Register hapoh JHADC.
Da kyntu leh wow chimkhia u wow yada yaka khyndaw u chyiap, u pood u ang ka chnong waka Elaka khlem da pyndem.
U President ka HYC Central Body, u Robertjune Kharjahrin hawa beiñ ye thoh u CEM ka KAAC, da ong u wa kopsar ym tip u iyi iyi leh yei parom warim namo ka History heiwa hei yongsakhiat i khyndaw u chyiap ha Mukroh, Barato, Psiar, Khanduli kiwa da em nadooh ki por warim katwa ka KAAC da mih ko dang ha u snem 1952 katwa ki Pnar wa chong wa sah ha kitai ki chnong da em chwa ki ha kitai ki chnong.
U Robert da dawa u leh ya u CEM ka Karbi Anglong Autonomous Council wow pyndam noh syndon ya itai wa da thoh u wei ym toh u pteiñ ya kam kini ki jait, lym kamtæ ka seiñ u kheiñ ko ya oo kam uwa choon ka jaitbru Ynñiawtrep wei hawa kheiñ kamtæ, ka seiñ leh daw chim ko ki laad ki luti wow yaleh pyrchah ya oo.
Hawa yatoh wa ini, neiliang u Thombor Shiwat leh da beiñ joor u yei thoh u CEM ka KAAC deiwa ong ka Council leh da pyntikna ko wa ka Mukroh ka em ko ya u pood u ang wa biang wei man ko leh ka chnong kawa da rim bha wa kynthup wa kiwi won ki chnong wa em ha khappood wei toh kiwa chong chnong hachwa ka Notification yong u snem 1952.
“Kam u khlieh ka Council nga em O yei kitkhlieh neibynta ki bru wa chong wa sah ha khappood, wei kam u bru ka Council wa pait yei khyndaw u chyiap i leh ym e laad i wow yoh kiwi yei hok wa toh i yong i,” ong u CEM ka JHADC.
Hajrong ini da khana u wa neiliang yong ki kam ka Council leh da dep phah ki cha ka sorkar jylla wa waroh ki thaw ki khyndaw wa haap hapoh u pood u ang ka District Council ym toh u dooh.
Kamjooh leh ya ki chnong Pnar wa em ha Block-I toh u wan uiñ biang lada i ya pynbait pood ha ki ar jylla u lai ki, neibhah ki em ki ya ki sakhi sabut lyngba ki kot ki sla.
Neitæ phah u leh ka khubor cha ki bru wa em ha khappood wa ki ym toh u artatien ki neibhah ka District Council em ko ha chrooh wei katwa ye daw yada yei khyndew u chyiap katkam ki kot wa pynsakhiat kiwa em.
Ha kani ka sngi hadien wa ka Save Hynniewtrep Mission da dep yachem ko wa u CEM ka JHADC, da thang leh yeiwa thoh u CEM ka Karbi Anglong Autonomous Council kamjooh leh ki dur wa lai hiar u cha Mukroh haka 29 tarik.
