U Montri ka sorkar jylla uwa man leh u Working President ka People’s Democratic Front (PDF), u Banteidor Lyngdoh da ong u wa u MP ka Karbi Anglong wa u CEM ka Karbi Anglong Autonomous Council (KAAC), toh u paanmaap ki hajrong i klam wei pynbaad wa kiwa chong chnong ka Mukroh toh kiwa pyrchah aiñ.
Da beiñ joor u leh yei klam deiwa ong wa ini i klam toh iwa bakla hadooh kattæ kattæ neibhah ka Mukroh toh i thaw yong ka Meghalaya wei haap ko hapoh ka West Jaiñtia Hills. Da ong u wa boi hadien wa pynkut ki yei mynsien ki 5 ngut, katni da sñiaw mantre ki wei da yoo lakam wa kwah ki wow khyrrup leh hadooh ka chnong Barato.
U Montri da ong u wa ini i klam ka Karbi Anglong daw rah u hakhmat u Montri Rangbah ka jylla, u Conrad K Sangma wei neiliang ka Meghalaya toh u lai ko wut-wut cha katai ka chnong wow pynbait wei wow klam leh ya u Montri Rangbah ka Assam.
U Bantei da ong u wa ym kwah u wow jia lane mih umsnaam ya kiwa chong chnong, tangwa lada kwah ki wow knieh yabor yei thaw, ye wow poi chei jia wym ye u pdiang, wei da kyntu u ya ki bor ka Assam wa wym toh u e diñ chooh hajrong ini i jia.
Hawa yatoh wa i lai ki heh ka Assam wa kynthup u Special DGP cha ka chnong Mukroh wow lai pait, da khana u wa wot kiwa yahkhmat katai ka chnong leh ym tip ki.
Hajrong i thmu yong ka KAAC wow chna ya u motdur u Forest Guard ka Assam uwa da yap lang ha ka chnong Mukroh, uwa yahkhmat ka PDF da ong u wa ka seiñ da dep ko wow pysñiaw wa in i toh i wym ye u pdiang wow chna hapoh u pood u ang ka Meghalaya, wei lada chna ym toh wow suki hi-eh ki, wei ka PDF daw lai ko cha katai ka chnong wei ym suki ko.
Hawa yatoh wa i booh khyrdop ka chnat Forest ka sorkar Assam, da ong u wa ka seiñ da yaklam ko wei ym chah wow booh ya katai ka khyrdop hapoh u pood u ang ka Meghalaya.
