Ka Seiñ Khynroo Khyllood Katholik Good Shepherd Parish Ladrymbai da pynman ko yei yachem wa chisien chi snem wa tip kam ka XX Annual Youth Convention 2022 kawa da pynman ha ka 9,10 wa 11 tarik uni u bnai ha Balang Jalyiah, East Jaiñtia Hills hajrong ka phang: To shad kmen barabor, wat ju pep ban duwai, 1 Thessaloniki 5:6,7.
Ha ka sngi sdang, da sdang dei ngooh i dem Blai lyngba ka knia ka khriam da u Assistant Parish Priest, u Rev. Fr. Ebormitre Henry Lamare uwa man kam u Spiritual Youth Director. Ya kani ka Convention da wan wai da ka Generous Dkhar kawa na chnong Dkhiah East kam ka kongsan.
Ha kini ki le sngi da yoh i sneiñ i kyntu na ki 4 ngut ki bru chemphang namo ki Resource Person kitæ ka Sister Lily Suchiang, ka Regina Kympat, u Anthony Syiemiong wa na ka Sister Sooki Nongrum kawa man kam ka Diocesan Lady Youth Animator.
Kam wow pynchlur wei e laad ya ki khynroo wow wan chimbynta ha kini ki sngi ka Convention, da em ki yalehke wa boonjait, ki yakob baam pyllah (Eating Competition), Religious Fancy Dress waka Gospel Dancing Competition heiwa ka Balang Wapung da man ko kam kawa yoh nyngkong, ka Balang Moolamanoh wa ar waka Balang Pamrapaithlu kam kawa yoh wa le.
Da pynman leh ya ka yakob yatai nia namo ka Debate hajrong ka phang: “Ki khynroo Katholik wa ka Politics” heiwa ka Eitilut Lyngdoh kawa na ka Balang Sohkymphor da yoh nyngkong ko, u Jonathan Siangshai naka Balang Pamrakmai hei wa ar waka Rimika Khaii na ka Balang Lumshyrmit hei wa le.
Ha ka Sngi u Blai da pynman ya ka Mass Wakhooid heiwa u Rev. Fr Ebormitre Henry Lamare, Spiritual Youth Director da man u kam uwa knia rangbah.
Ya kani ka Convention da wan wow pynhaap pyrda da u Kyrmen Shylla wa man kam u MLA ka thaaiñ kam u kongsan wei wow saam khusnam cha kiwa jop ha ka yakob, kamjooh cha ki khon khynroo khyllood ka Parish kiwa da yoh 70% chaneiñ ha ka kyrdan SSLC, HSSLC, Graduation, Post Graduate wa cha kiwa da dep pure ha ka kyrdan Professional Course yong uni u snem 2022 kiwa dapoi hadooh 24 ngut.
Da chimbyntalang ha kani ka sngi da ki rangbah, ki manbei manpa, ki khynnah, ki khynroo khyllood wei da poi 272 ngut kam kiwa sah Delegate wei ha ka Sngi u Blai da em kamwa 500 ngut tam na ki 24 tylli ki Balang chnong wa haap hapoh ka Parish Ladrymbai.
Da pynchongchit wei pynphooh pynphieñ ya kani ka Convention da ka put ka tem, i chaad i kmen wa i rwai i siaw.
Ya kani ka Convention da pynman hei yahkhmat u Ripos Lyngdoh kam u President wa u Wellson R D Siangshai kam u General Secretary ryngkat wa ka Core Team ki khynroo yong ka Parish.
