Uwa e ktien ka Meghalaya Pradesh Congress Committee (MPCC), u Ronnie V Lyngdoh da sai biang u ya ka phang Citizenship Amendment Act, ha kawa da ong u wa ha u Kmaichonglad (Dec) yong u snem 2019, waroh 60 ngut ki MLA da mynjur lang ki hapoh ka Yung Dorbar Chna Aiñ ka jylla wow pyrchah bait ya ka CAA. Tangwa heipor wa wanrah ya ka CAB hapoh ka Yung Dorbar Parliament, ka MP yong ka NPP na Tura kawa man ka diah tre u Montri Rangbah da kyrchaan ko ya katai ka aiñ hapoh ka Parliament.
Uwa yahkhmat ka Congress da ong sa iyi won wa dang pynartatien wa ka NPP toh ka jooh wa ka BJP, deiwa pynrap wa ki paidbah toh u sñiawthooh ki wa ya iwon iwon wa da yoh næ kawa dooh toh lyngba ki aiñ.
U Ronnie da kylli u leh ya ki seiñ ri-loom kiwa ya krehlang ha ka sorkar MDA wa yahkhmat da ka NPP, deiwa ong wa lada ha u snem 2019 da pyrchah ya ka CAB ha Assembly, wei lada booh sakhiat ki ya ka jaitbru hakhmat, da toh wow mih noh na ka sorkar MDA, wei i suki yong ki da pynyoo wa ki emkti lang wow pynman aiñ ya ka CAB neibhah ki kheiñkor ki ya ka chuki.
Ha iwi i liang, u JA Lyngdoh uwa man uwi na kiwa yahkhmat ka Congress, da ong u wa ki bru da yooluti bha ki ya ka Election neibhah ym kwah ki wow yoo wa kani ka sorkar MDA ym toh de wow wan ko hei bor ha kani ka jylla, wei lada ki paidbah da ngiah ki ya ki seiñ kiwa em ha ka sorkar MDA toh du cha ka Congress wow kyruiñ khmat ki.
