Ki pulit ka East Jaiñtia Hills da pyntip ki wa ha ka 16 tarik uni u bnai da em kiwa yoo ya 3-4 ngut ki khynroo kiwa da uiñ deiwa yoo suba hi-eh ha iwi i khloo wa em ha ka thaaiñ Jalaphet Bri-Sumer kiwa rahlang wa ki synduk kot namo ki Carton.
Kamtæ deiwa pyrkhat wa da jan Election wei kini ye ki wow em i thmu wow pynthut ya ka Election MLA 2023, neiliang ki pulit hei yahkhmat u B. Jyrwa, MPS, Addl. Superintendent of Police wa u SI K. Pdahkasiej, In-Charge Umpleng AD Camp wa u SI B. Marbaniang na Saipung PS deiwa emlang leh kiwi ki pulit da lai ki dei miet cha ini i khloo yow chem tre iyi yoh kini ki khynroo u leh.
Ha ini i lai cha ini i khloo da chem ya iwi i trep masi wei hapoh da em soo ngut ki bru wa thiah wei da em leh boon tylli ki synduk kot hapoh kani ka trep.
Hadien wa wai ya kini ki synduk hapoh 26 tylli da em ki Gelatine Stick katwa ha ki 4 tylli won ki synduk da em ki Electric Detonators wei da kem lut ya kini waroh.
Waroh kini ki Gelatine Sticks da khia ki 650 Kg wei ki Detonators toh kiwa em kamwa 200 tylli.
Ki ki soo ngut kiwa da chah kem toh u Point Chyrmang (30 snem), u Nikalai Chyrmang (21 snem), u Mij Chyrmang (22 snem) wa u Shanbor Chyrmang (22 snem) kiwa waroh na Jalaphet.
Ki pulit dang pynman ki yei takit yow chemdien kammon da pynpoi ya kini ki tiar tympdung ha ini i thaw wei neiwon da poi ki.
