Ki artylli ki seiñ wa kynthup yaka Sur U Paidbah Ka Bri U Hynniewtrep wa yahkhmat da u Rastingwell Thabah kam u Chairman, u Pyrkhat Shylla kam u Convenor ha Ri-loom Jaiñtia waka seiñ Hynniewtrep Border Dispute Redressal Forum wa yahkhmat da u Chandame Sungoh Chairman, ka Purity Phawa Secretary, ha ka 18 tarik da lai kyrpaad ki ya u Deputy Commissioner ka West Jaiñtia Hill District wow pynpsiah pyrtuid noh hapoh ka Electoral Roll ya 36 tylli ki chnong wa haap hapoh ka Block-I khnang yow yoh ki yei hok u chimbynta hei jied wa mihkhmat ha kani ka Election MLA hapoh ka jylla Meghalaya.
U Chandame Sungoh ong u wa da yoo kam cha ka Raij Nongtung hapoh Block-II, ka Assam dang kam pood ko nadooh Sabuda wa em ka Battalion Outpost yong ka, tangwa lada pait ya kini ki chnong ha katai ka thaaiñ dang psiah ki hapoh Electoral Roll ka jylla Meghalaya wei yoh ki wow yaleh EPIC Card hei pyrtuid ka chnong yong ki hi, kamtæ iyi u eh won ya ki chnong kiwa ha Block-I hapoh ka Elaka Labang Nangphyllut wa Pangam Raliang neibhah hawa wot ki chnong ha Block-II leh toh kiwa haap hapoh ka thaw khajia pood hi wada kamtre daka Assam.
U Rastingwell Thabah ong u i daw wa maad jynjar saja ki paidbah ha kiwa boon ki liang la haki sarok, ki thawa sumaar, puræ puthi wa kiwi toh wym em ki ka EPIC, wei wot hawa im i haka ri wa yoh i laitlooid i wym em i ñiaw chiliangkhmat tangwa ki bru haki khappood won dooh ki yei hok.
Kamtæ kyntu u yaki seiñbhalang waphær waphær kiwa maya yaka ri waka jaitbru wa toh i por wa biang bha wow mih chakhmat u wanrah yaki bru yong i cha Meghalaya lyngba ka EPIC, wei uwi leh wym toh u dooh thap Vote.
Ong haroh u wa da toh u e sneiñ yaki kyrtong wa toh u kular ki yei yi wa ye ki u leh neibynta ki bru wa chong ha khappood neini chakhmat, wym wow kular ke hi-eh yaki paidbah tangwa u kular yeiwa ye u leh najrong wow pynpsiah ki yaki phang krehkaam haka Manifesto yong iwa ye ki u leh.
Heijooh i por kini ki ar seiñ pynsñiaw haroh ki i pyrchah yaka sorkar Assam wa da chna sarok embor na laad Umlaphiah yow pynpsiah cha soo tylli ki chnong Karbi kam cha chnong Pangpung, Rongkhlang, Samatan, Ummalæng.
“Kamwa nga toh uwa na katai ka thaaiñ tip bha O yei thmu ka Assam wow pynyabi wa u sarok na Umpawiang, Rongpangbong, Nongjrong Tahpat kawa mih ha San Shka haka wah Mynriang,” ong u Chandame Sungoh.
Lyngba kitai ki sarok leh da em leh i leh dusmon wa khroo yaki luti syngkieñ lai rep lai khih ki paidbah ha chnong Mukroh deiwa tih yillu kamwa 5-6 phut kawi ka thlu wei yillu 7-8 phut chapoh wei tymmoh sa daki chnat dieñ, ki sla dieñ hajrong kamwa eiñ chynnam yaki bru wa lai khih lai rep.
