Ka Dorbar Chnong Chilliang Raij, Jowai lyngba ka General Meeting ha ka 30 tarik u Khonchonglad (Nov) 2022 da iwi i sur da rai ko wow pynbna ya ki kyndon heiyatoh wa ki yalang pynsñiawthooh paidbah yong ki kyrtong waphær waphær ha kani ka Election MLA 2023 kiwa man kamni ha wah.
Kiwon kiwon ki yalang paidbah yong ki kyrtong hapoh Yungwalieh wow pynkut hapoh ka 10:00 waje i miet.
Uwon uwon u kyrtong ye u wow yah du hapoh 8 ngut donhi kiwa bood ya oo kiwa na baar ka Chnong Chiliangraij, wei heijooh i por u chah du 2 tylli donhi ki kari kawa kynthup ya ka yong u kyrtong ki wow psiah cha ka thaw wow pynman ya ka yalang paidbah yow lait nei khynnia khynrah ki luti syngkieñ.
Ka yalang paidbah hapoh Yungwalieh toh du kat ya ki tre chnong donhi (lait noh na kitai ki phra ngut kiwa da chah u emlang wa u kyrtong).
U chah leh du kamwa 3 ngut donhi ki wow klam wa kynthup wa u kyrtong ha kani ka yalang paidbah hapoh ka chnong, wei ye leh u klam uwi donhi na kiwa chong chnong u/ka wa kyrchaan ya u kyrtong, tangwa ym toh kiwa kitkaam yong ka chnong.
Kiwon kiwon ki kari yong kiwa kyrchaan ya ki kyrtong ym hoi u pynheh sur næ ki rwai wa tem hapoh ki kari yong ki ha ki por wa em ka yalang paidbah næ ha ki por wym em leh ka yalang paidbah hapoh ka chnong.
Ka chnong khang pyrchah ko ya kiwon kiwon ki kari kiwa uiñ miet uiñ synyaaw, da khang leh ya kiwon kiwon kiwa saam poisa, lada chem ya kam kini (kiwa saam poisa) u pynchitom katkam ki aiñ yong ka chnong kamjooh u e kti cha ka aiñ sorkar lada dawa.
Ka chnong da khang ko leh wym hoi u pynriam, pynphooh pynphieñ ha ki thaw wow pynman ya ka yalang paidbah namo ha kiwon kiwon ki bynta yong ka chnong, wei da khang yei e cha e dud ya ki paidbah lait noh na kitai ki phra ngut (neibynta wow wanrah yei khooid i jngiar).
Da kyrpaad ya ki kyrtong kiwa daw pynman ya ka yalang paidbah hapoh ka chnong wa emkaam u bood ryntih ki ya ki kyndon kiwa da booh. Kiwa leh pyntam næ tyngkheiñ ya kini ki aiñ ki kyndon kiwa da booh da ka chnong, u pynchitom chisien don wei heijooh i por leh ye wow pyndam chi syndon ya ka yalang yong ki.
Ya kiwon kiwon ki kaam kiwa dawa, emkaam u e yutip næ yoh bor chwa na ka yung krehkaam yong ka Dorbar Chnong.
Ya kini ki kyndon da booh salonsar ya waroh ki kyrtong khlem da niaw chiliangkhmat wei da kyrpaad leh ya waroh wow e yei yakrehlang khnang wa kani ka Election MLA 2023 u man ko kawa khooid wei lai bait lai ryntih neibynta i bha i miat yong ka chnong kamjooh ha ka imlang sahlang hi waroh kawi.
Ini i pyntip wan i na ka yung krehkaam yong u Waheh Chnong wa u General Secretary yong ka Dorbar Chnong Chiliangraij, Jowai.
