U Chief Adviser ka United Democratic Party (UDP), u Bindo Mathew Lanong da ong u wa i kam yong ka UDP wow jop hadooh 30 ngut ki MLA ha kani ka Election wow wan toh du i yimphoo donhi.
U Bindo da chah pyndooh Ticket u ha ka UDP wow yakhun na Nongkrem wei da ong u wa ka UDP daw jop ko du hapoh kamwa 10 ngut ki MLA ha kani ka Election wow wan, heiwa da ong u leh lada kynthup lang ya oo hapoh ka Party ka UDP ye ko wow jop kamwa 15 ngut.
U Bindo uwa man leh uwi na kiwa embynta wow seiñ ya ka UDP, da ong chooh chooh u wa kiwa em hapoh ka UDP toh kiwa da em dak soo sih suda katwa da pyndooh ya u bru uwa khooid. Da ong leh wa lada ka UDP ka e Ticket ko ya u bru uwa da em chwa hapoh ka UDP, oo kam uwa yahkhmat u pdiang wei u kyrchaan u ya utæ u kyrtong.
Da ong u wa ha u snem 2018 ka UDP ym em kyrtong ko na Nongkrem, wei toh na ini i daw wa da lai u wow yakhun hi ha kani ka kynti.
Hawa kylli hajrong i tyrwa yong ka Party wow pynyakhun ya oo na East Shillong, kawa man nachwa ka Malki-Laitumkhrah Constituency ha i por wa jop u kam u MLA, neiliang u Bindo da ong u wa ki mut ki wow pynriam ya oo wow yaleh na Malki-Laitumkhrah neibhah em marchiteiñ kiwi won ki jaitbru ha katai ka Constituency.
