U MLA warim ka Mowkaiaw Constituency nadooh u 2013 hadooh u 2018, u Robinus Syngkon wei katni won kam u MDC ka 15-Raliang Constituency nadooh u 2019, ynne da pynbna paidbah u wow yakhun u ya kani ka Election MLA na ka 3 Raliang Constituency kam u kyrtong ka TMC.
Hawa yaklam wa kiwa pathai khubor da ong u wa kam u MDC da chem u chiboon i duna ha ka District Council wei manda klam u yeitæ wow leh bha ya ka Council da chah pynhiar chuki noh u.
Ki yurim yong oo ha kani ka kynti da yoo u wa ki khynnah khynroo wa katni ym em ki ya ka mynried kawa bha hanlada dep ki yei puræ yong ki leh nadooh ki Engineer, ki Doctor wa kiwi kiwi iwa da pynsñiawkhia u kamtæ da rai u wow yakhun ya kani ka Election khnang wow kreh u neibynta yong ki.
Da khana u leh wa ka TMC em ko chiboon ki Scheme wa daw wanrah ko ha kiwa boon rukom.
Chooh chooh da pynkynmoo u ya ki khynnah khynroo kiwa da thap pyrtuid kreh tangwa da ki snem leh ympu mih i pyrtuid.
Da kyntu u ya ki paidbah wow pyrkhat bha hawa jied ya kiwa mihkhmat wei ymtoh u chah thied ki neibhah katni da jemdor da ki bru bar ya ki mrad wei wow man kam ki broo yong ki heh spah.
Heiyatoh wa man kiwa mihkhmat kiwa dang duna hei stat i tip, da kylli u kammon man ki kam kiwa mihkhmat khlem chna ya ki aiñ wow yada ya ka jaitbru yong i.
Heijooh i por da kyntu u ya ki manbei manpa wow pyrkhat bha neibhah hawa phah lai puræ ya ki khon manda dep puræ daw kreh ki kam kiyi re kiyi wei boi dang heh da ka tulop kiwa khlem lai skur iwa da pynsñiawsih ya oo neibhah boonjait ki laad yoh kreh hanla ymtoh dei kreh sorkar tangwa kiwi ki jait kreh na ki chnat sorkar wa e yarap ya ki tangwa kiwa mihkhmat ym em u thoohlaad ki yeitæ.
Heiyatoh wa ka Reservation Policy wa da khian ka bhah yong ki Khasi Pnar iwa da hiar i neidaw ka Roster System da ong u wa emkaam bha u yakhun yeini.
Da kdaw u wa heiyatoh ki khloor yalehke manda wan ki wa ki takma ksiar ym yoh ki iwon iwon i yarap na ka sorkar tangwa ha Assam kiwa yoh takma ha ki lympung yalehke won yoh ki i kreh kam ki DSP wa kiwi kiwi wei oo manda jop daw kreh u neibynta ini.
Da kyntu u ya ki manbei manpa wa ymtoh wow pynjemdaw ki heipor Election tangwa emkaam wow pyrkhat ki ya ka mynried yong ki khon yong ki.
Chooh chooh da kdaw u yeiwa sih ki sarok kam ha Nongjngi, ha Nangbah wa kiwi kiwi kiwa man kiwa da sih bha katni.
U Robinus da kyntu u leh ya ki paidbah wow e ki ya i kyrchaan ya oo wow man u kam u MLA ka Raliang Constituency deiwa chon ha i dur ar syntu wow ye u wow kreh neibynta ka mynried ka mankawi ki khon ki kti wa ka pateiñ waroh kawi.
