U MLA wa da hiar chuki noh ynne na ka Gambegre Constituency wei da lai uiñ biang u cha ka seiñ Indian National Congress (INC), u Saleng A Sangma da ong u wa i mih noh i yong oo na ka Congress ha ki por wa da lai toh neidaw wa da chah kynjet u ha u bru uwa tieñslah wei i wan uiñ biang cha ka Congress toh neidaw wa utæ u bru uwa kynjet ym em de u ha ka seiñ Congress.
U Saleng da jop nyngkong u ya ka Election MLA na ka Congress ha u snem 2008, tangwa ha u snem 2013 neidaw wa yaphær yumut wa u Dr. Mukul Sangma da chah pyndooh Ticket u ha ka Congress heiwa da yakhun wei da jop u ya ka Election kam u kyrtong khlem seiñ wei ha u snem 2018 da yakhun wei jop u kam u kyrtong ka Nationalist Congress Party (NCP).
Hawa klam wa kiwa thoh khubor hadien i lai uiñ biang cha ka Congress, u Saleng da ong u leh wa u bru uwa da kynjet ya oo na ka Congress toh uwa tieñslah wei u wym neh chah de ha ka seiñ Congress wei da lai u cha ka All India Trinamool Congress (AITC), wei i wym em de utæ u bru da wailaad ya oo wow lai uiñ biang cha ka seiñ wa da jop nyngkong u.
Ha iwi i liang u Saleng da mynjur u leh yei ong uwa yahkhmat ka AICC, u Anthony Mathew wa i wan uiñ yong kiwa yahkhmat cha ka Congress toh neidaw wa katni ka Party em ko uwa yahkhmat da u Vincent Pala uwa sñiawkhian.
