U National Vice President ka Bharatiya Janata Party (BJP) uwa pait ya ka Party ha Meghalaya, u M. Chuba Ao ym em kyrngah u wa ka Party u dam ko u ya krehlang wa ka seiñ NPP hadien ka Election ha ka jylla.
Hawa pynsñiaw wa iwon iwon leh ye wow man ha ka Politics, u Chuba Ao da ong u ya ka Election hap wow yakhun deiwa ya pynbaad markylliang, tangwa du hadien wa da jop waroh da ya mylliñ ki yei pynbaad.
Hawa kylli wa ka BJP ye ko wow ya krehlang wa ka Trinamool Congress lada du ka NPP wa BJP ym ye ki wow poi cha ka thong i boon ki MLA, u Ao da ong u wa ka BJP toh kawa smat palat u yaklam wow ya krehlang wa ka TMC. Tangwa da ong u wa bha wow yang chwa kammon mih na ka Election, wei hadien itæ daw rai yeiwa bha tam kammon u leh yow yoh synchaar.
U Ao hawa pynche yei kam yong ka BJP wa ym ye wow chna sorkar ha Meghalaya hadien ka Election khlem ka BJP, da ong wa ka Meghalaya toh ka jylla wa khian, wei ki seiñ ri-loom emkaam ki ya ka BJP neibhah wow synchaar ya ka jylla ym man iwa eh neibhah wa hap chaniah lut ki ha ka sorkar pyrdi.
Katkam i ong uni uwa yahkhmat ka BJP, ki seiñ ri-loom emkaam bait ki yei yarap yong ka BJP hadien ka Election, neibhah khlem ka BJP ym ye ki wow lai paan yarap na Delhi.
