U kyrtong MLA ka TMC na Jowai Constituency, u Awhai Andrew Shullai uwa man leh kam u MDC ka Jowai Central, ynne da sdang u ya ka rynsan yalap Election na yung wa sah u deiwa wan kyrchaan u MLA warim ka Jowai, u Dr. R.C. Laloo chirup kiwa kyrchaan na ki thaw waphær waphær hadien wa ha kini ki sngi ki tayaw wa da lai da dep wow pynskem ya ki chnat krehkaam ka Party ha kiwa boon ki chnong ki thaw.
Ha kani ka sngi u Andrew da pdiang sñiawbha u leh ya u Brightstar Chyrmang, MDC ka Jowai North uwa da mih na ka Party NPP yow kyrchaan noh ya u Andrew.
Kiwa klam ha kani ka yalang wa kynthup nadooh u Philemon Lyngdoh, MDC warim, u Madonbai Rymbai, CEM warim ka JHADC, u Wanbun Dkhar na Khliehtyrchi, u A Star Ryngkhlem na Madur, u J. Rymbai na Mukhla, u Dawan Dkhar na Dulong, u Niman Shadap na Mukhla wa kiwi da kyrpaad ki ya ki paidbah ka 2-Jowai Constituency wow jied noh da u Andrew Shullai ha kani ka kynti khnang wow ye u wow wanrah yei kylla ya ka Constituency ha kiwa boon ki rukom deiwa pynbaad wa ka sorkar wa da synchaar ha ki 5 snem toh kawa da lehbeiñ ya u paidbah ha kiwa boon ki rukom najrong wa emkti ko hei baam tooh.
Da ong ki leh wa ka NPP waka UDP man ki ki jooh hi ha kini ki 5 snem wei lada wan biang ki ha ka sorkar daw man ko i eh wa khroo ya ka imlang sahlang.
U Andrew hawa e yei klam da khana u chaphang ki 10 tylli ki kular ka TMC wa kynthup wow pynmih 3 lak tylli ki kreh ha ki san snem wei ya kitu ki wym pu em yoh kreh kiwa nadooh 21 hadooh 40 snem daw e yarap T. 1000 chi bnai lyngba ka Meghalaya Youth Empowerment Scheme.
Daw sdang leh ya ki Incubation Centre neibynta kitu kiwa kwah wow seiñ khih seiñ khan deiwa e yarap wei e sikai ya ki khynroo.
Da ong u leh wa katni em boon ki kreh wa lait tangwa ym em wa khut pynman Interview wei kawi na ki phang yalap Election toh yow pynman ya ki DSC Election man-i-por wei wow pynmih Result smat. Da e nongmuna u wa kitu kiwa yaleh kreh LDA nadooh u 2021 heiwa i pynbait ya ka Result toh da ki OMR Sheets tangwa ileh won ym mih Result hadooh katni iwa yoo lakam wym kheiñ ya ki khynroo khyllood kiwa emkaam yei kreh.
Da kdaw u leh wa ka heh ka TMC ka Mamara Banerjee toh du kawa man kam ka Montri Rangbah da ka kynthai hapoh waroh kawi ka ri, kamtæ em bha ko yei sñiaw ya ki manbei wei da pynmih leh ya ka WE Card ka wow e yarap poisa cha ki manbei.
Neiliang u Dr. R.C. Laloo da ong u wa i yaleh Election u Andrew Shullai naka TMC toh i mon u Blai wei da toh i por wow jop u. Deiwa e nongmuna u yei yong idæ wa oo da rem u kam u MLA ka Jowai ha u 1998 wa ha u 2003 neidaw wa maya u Blai heiwa da pynkylla wamut wei da seiñ dur u deiwa wei da yoh biang u yei jop ha u 2008.
Kamtæ da ong u ya u Andrew wow duwai Blai step wei miet yow yoh yei mon yong u Blai neibhah i chakri paidbah toh iwa kyntang.
Da kyntu u ya ki paidbah wow jied ya u Andrew wei kamjooh leh ya u Andrew manda yoh yei jop wow synchaar deiwa khooid yow lait nei chah kdaw kti.
