Ynne ka sngi u Montri Rangbah ka jylla uwa man leh u National President ka National People’s Party (NPP), u Conrad K. Sangma da sdang u ya ka yalap Election na ka 51-South Tura Constituency ha madan ka New Tura Law College, West Garo Hills.
Ha kani ka yalang u Conrad da kdaw u wa du ka MGNREGS kawa da em 20 snem nachwa da ye wow pynku i yoh poisa da boon chah katni.
U Montri Rangbah da kdaw u leh wa ha u 2018, i yoh yarap man i du T. 500 klur ya ka MGNREGS ha ka jylla tangwa hadien wa chim kani ka sorkar thymme da kynjoh i chadooh T. 1800 klur wei ini ymye i wow man lada ym em i kitkhia na ka sorkar hadooh wow booddien yei pynkrehkaam ya ki kreh.
Da kdaw u leh wa ka jylla jooh em ko ha tre dooh heiyatoh wa i pynkrehkaam ya ka MGNREGS, heiwa da em ko ha i kyrdan wa 25-28 na waroh ki jylla tangwa ha ki san snem wa da lai da ku kam ka kawi na ki jylla wa da lehbha.
Da ong u leh wa i chna sarok hapoh ka PMGSY, ka Meghalaya da yoh ko yei naam kam kawi na ki jylla wa pynkrehkaam bha ya kani ka Scheme heiwa nadooh u 2018 hadooh u 2022 da chna awjan 2000 Km ki sarok katwa 15 snem nachwa da chna du 700 Km donhi.
U Conrad da ong u leh wa ka Meghalaya kaktni da man ko kam ka nongmuna ya kiwi ki jylla wow bood yei pynkrehkaam ya ka Jal Jeevan Mission yow pynpoi umkor cha ki yung ki bru hadooh wa u Montri ka Jal Shakti, u Rajendra Shekhawat heipor wa wan u cha Shillong hakhmat kiwa thoh khubor da yaroh u yei pynkrehkaam ka Meghalaya ya kani ka Scheme.
“Ka Meghalaya da kylla ko yeiwa bha,” da ong u Conrad deiwa pynrap wa ha kini ki 5 snem hadooh ka New Delhi leh da yieñ ko wow pait neibhah nachwa ym jooh ye wow pynemkaam ya ka poisa wa da e cha ka jylla tangwa katni won i roi i paar ym toh de iwa ke.
“I angnood i toh wow pynman ya ka Meghalaya kam ka Model State kawa ya ryngkat kyrdan wa ki jylla wa bha tam hapoh ka ri,” da ong u Conrad.
