U Montri Rangbah ka jylla uwa man leh u khliehdooh ka National People’s Party (NPP), u Conrad K. Sangma ynne da sdang u ya ka yalap Election na ka 51-South Tura Constituency ha madan ka New Tura Law College, West Garo Hills heiwa da em palat 5000 ngut ki paidbah kiwa da ya wan wow emlang.
Hawa paan ya i kyrchaan ya ka NPP ha ka Election MLA wow wan, u Conrad da kdaw u ya ki kaam pynroi wa da wanrah neibynta ka Constituency wa ka jylla hi waroh kawi khamtam hadien wa kynjoh ka jylla 45 snem i chah iehbeiñ ka Ri-loom Garo wa ka khamtam ka Tura Constituency.
U Conrad da ong u leh wa ki paidbah ka Tura da pdiang ki ya oo ha ka Election chiteiñ samoi wei da jied ya oo deiwa pynjop hadooh wa tam u 8500 tylli ki Vote.
Chooh chooh da kdaw u wa chwa ka sorkar u, ym em ki kaam pynroi hapoh ka jylla liang wanang katwa ka sorkar wa yahkhmat da ka NPP na u snem 2018 da kheiñkor ko ya i stat i tip, i kreh ya ki kaam wow pynku ya ki khynroo khyllood, i chait i khiah wa ha kawi pa kawi ka chnat sorkar yow pyntikna wa i roi i paar wan i.
Da kdaw u leh wa 15 snem nachwa da ye u chna du 700 Km u sarok katwa hapoh ka NPP nadooh u 2018 hadooh u 2022 da ye wow chan awjan 2000 Km u sarok hapoh ka jylla.
