U MLA ka Nartiang, u Sniawbhalang Dhar hawa e yei klam ha ka yalang paidbah ka NPP wa da pynman ha madan Jrisaleiñ, Jowai ynne ka sngi, da ong u wa kiwa klam kiwa pynbaad da em ki man-ka-minit, man-ka-sngi tangwa kiwa yaroh ya ki kaam wa bha ka sorkar ym em kamtæ da pynkynmoo u wa heipor wa em ka khlam COVID, neiliang u Montri Rangbah wa u Symbood Montri Rangbah da dooh thiah dooh dem ki wow yada ya ka jylla wot wow wanrah biang cha yung cha sem ya kitu ki kiwa lai puræ lai kreh cha baar jylla heiwa da pynlut poisa da ka sorkar wow wanrah wow pynpoi biang ki cha yung.
“Tangwa lada kwah phi ya ka sorkar kawa khlem chah klam toh ka sorkar kawa thiah sngi, wei da toh u kylla thiah, kylla dem yow lait u man ka District kawa sahdien,” da ong u Sniawbhalang deiwa pynrap wa ym ye u len wa ka Ri-loom Jaiñtia toh kawa yoh kyrkhu wa boon tam ha kini ki 5 snem tangwa kattæ leh em bait kiwa klam cha wah chaneiñ wa ya ka Ri-loom Jaiñtia ym em wa pait ka hanla da dep yoh Block thymme la ar tylli najrong wa da pynbiang ya ki Health Centre, ki PHC wa ki CHC.
U Sniawbhalang da e jubab u leh yei klam u MLA warim ka Jowai, u Dr. RC Laloo wa yoowyrai ya ka Jowai wa da jia dei wym jooh jia wa chah lehbeiñ hadooh katni heiwa Sniawbhalang da ong wa jia sakhiat tangwa jia neibynta wa bha ym em jia neibynta iwa sih.
Da e nongmuna u deiwa kdaw wa nachwa heipor wa u MLA warim ka Jowai man u kam u Montri ka chnat PHE ym ye u wow pyndep ya ka Jowai Water Supply Scheme tangwa manda poi i por u Wailad da ye wow pyndep ya ka. “Jia sakhiat i wym jooh jia ha Jowai,” da ban u Sniawbhalang.
Da ong u leh wa ya ka Jowai da pynbna kam ka Smart Town, da yoh ya ka Mini Secretariat, ka sarok Jowai Bypass na Riaturiem cha Treiongriang kawa ym jooh poi cheiwon cheiwon heipor ki MLA wa ki Montri Rangbah warim tangwa heipor u Wailadmiki su kreh deiwa lut T. 93 klur. “Jia dei wym jooh jia, itæ toh iwa sakhait,” da ban biang u Sniawbhalang.
Da khana u leh wa hapoh ka NPP ym em kitæ ki Team-A, ki Team-B, ki Team-C tangwa ya tylli ki iwi don neibynta ki kaam ka jylla, ym toh kam kiwi ki Party lada 4 ngut ki MLA itæ mut 4 ngut kiwa yahkhmat lada 7 ngut ki MLA em 7 ngut kiwa yahkhmat. “Hapoh ka NPP ym yoh por i wow yaknieh chuki, i dooh thiah, dooh dem i neibynta ki paidbah wa kammon u pynku ya ka jylla yow ryngkat ko wa kiwi ki jylla ka ri,” da ong u Sniawbhalang.
Heiyatoh waka Jowai Municipal Board won da ong u wa u RC Laloo hi wa wanrah ya ka Municipal dep te ieh u ka kam kawa khlem bei khlem pa, khlem e baam e dih hadooh wa da chitom ki paidbah, “Hei yahkhmat O kam u Urban Minister wa u Wailadmiki Shylla da dooh thiah dooh dem kammon wow pynbait ya ini i kaam wei daw pynbait hi leh da kawa neh rta ym toh u tieñ phi,” da ong u Sniawbhalang.
Chooh chooh da ong u wa katni da chna Politics ya ka thaw noh jhep, “Nga jooh ong O ham yaleh Election wa ka jhep, kiwa nood wow File Nomination yaleh wa i, ka jep ym em mynsien ko.”
Kamtæ da ong u wa la ha kawon kawon ka kaam toh u ya krehlang, toh u em i kitkhlieh, ym toh u leh Politics ya ki kaam wa ktah ya ki paidbah wei ka sorkar NPP toh kawa leh ya kiwon kiwon ki kaam wa kiwi ki sorkar ym ye ki wow pyndep.
Hajrong ini da paan u yei kyrchaan ki paidbah wa hawa yoh yei jop wei ha ka sorkar thymme daw ye wow pyndep ya ki kaam wa dang sah.
