Ynne ka sngi u kyrtong ka TMC na 4-Mowkaiaw Constituency u Lasting Suchiang, da wan thap pyrtuid namo wan File Nomination u ha yung krehkaam ka E.L. Warjri, Additonal Deputy Commissioner ka West Jaiñtia Hills ha Jowai.
Hawa yaklam wa kiwa pathai khubor hadien wa thap pyrtuid da ong u wa oo kwah u wow e i chakri ya ka Constituency wa ka jylla hi leh waroh kawi khamtam kiwa duna hei yoh i laa.
Heiyatoh wa i duna hapoh ka Constituency, u Lasting da ong u wa katkam wa man katni ki luti syngkieñ man ki kiwa khian wei kiwa da sih bha hadooh kattæ wei da emkaam wow pynheh ya ki.
Chooh chooh da ong u wa ki skur leh dang duna bha ki wei kiwa sikai neh ki kamjooh katwa ki khynnah won dang boon ki.
Hajrong i chait i khiah da ong u wa dang em chiboon i duna ha ki thaw sumaar heiwa man-i-por hap lai ki bru cha Jowai wa cha Shillong wow yoh dawai nebhah ki PHC leh duna wei kamjooh leh ki Doctor.
Da klam u leh ya i rep i riang wa kiwi kiwi.
Ha kani ka sngi da wan thap pyrtuid leh u kyrtong ka UDP na kani ka Constituency u Nujorki Sungoh u wym em bien u yaklam wa kiwa thoh khubor.
