Kat dang mih ki sngi ka seiñ TMC leh dang pynkhlan ko hapoh 2-Jowai Constituency heiwa ynne ka sngi u MDC ka Jowai North, u Brightstar Chyrmang da khut u ya ka yalang wa kyrpang ha pchem yung yong oo hajrong ka thong wow kreh na mynsien neibynta u kyrtong ka TMC u Andrew Shullai.
Kiwa wan cha kani ka yalang toh kiwa jooh kyrchaan ya kiwi ki Party nachwa kiwa kynthup na ka Congress, BJP wa NPP na ka chnong Mihmyntdu.
U Jrome Biam uwa man kam u Asst. Waheh Chnong ka Mihmyntdu hawa e yei klam da ong u wa ha kani ka Election hanla em kiwa wan tyrwa poisa cha ki paidbah emkaam won wow pynjop bait ya u Andrew ha kani ka kynti wei lada ym yoo hoi ya u Andrew hadien san snem dang ye u kylliang da uwi tawon.
Da yooluti u leh wa u Andrew daw ye u wow kreh neibynta ka chnong ka thaw, hei thung kreh wa kiwi kiwi.
U Juhhi Biam uwi na ki waheh ka Mihmyntdu da ong u wa ha u snem 2018 da kyrchaan bha u ya u Wailadmiki Shylla wei da rai u wow kyrchaan ya u Andrew ha kani ka kynti toh neidaw wa kyrchaan u Brightstar na ka chnong kamtæ da kyrchaan noh u ya u kyrtong ka TMC wei neibhah dang heini donhi wa yoh Syiem (MDC) na ka chnong.
Chooh chooh da kyntu u ya ki kur ki jait waroh na ka chnong Mihmyntdu wow kyrchaan ya u Andrew neibhah kam uwa chong chnong ym kwah de u wow dooh MDC biang ka chnong ha ki por wow wan.
Neiliang u Brightstar da ong u wa dei kreh chitom ha uni u snem da toh wow pyntam Vote chiboon ya u Andrew bar ya kiwi ki kyrtong deiwa kyrmen leh wa u Andrew u jop u ha kani ka Election 2023 lyngba kani ka yalang ynne wow kreh chitom ki hapoh ka chnong.
Da beiñ u leh ya kani ka sorkar heiyatoh wa i pynkrehkaam ya ka Saubhagya Scheme wow pynpoi chrot bordiñ ha kylleiñ ki chnong palatsor tangwa nei baamtooh u James Sangma ha kitu ki por wa man u kam u Montri ka chnat bordiñ da chem chitom bha ki paidbah neibhah boon ki paidbah wa chna yung emkaam chrot wow taan bordiñ wei uwi u chrot chongdor u hadooh T. 50,000 wei na oo ymye u wow yarap ya ki neibhah wa sy’at ware uwi u chrot.
Chooh chooh da ong u wa ha ka bynta wa nyngkong yong kani ka Scheme ka sorkar pyrdi da chem ko yei pynemkaam bakla ya ka poisa da ki klur ha ka jylla iwa da pyndooh myntoi ya ki paidbah ka jylla.
U Brightstar da ong u leh wa i pynlai tooh ya u mooyong hadooh katni da wanrah yei dooh wa khroo ya ka sorkar deiwa ktah ya i yoh i laa ka sorkar wa khamtam ki paidbah wei da pynlai ya u mooyong toh du da ki kattu katni ngut ki bru ki wow lai thied Vote won katni.
Kamtwa kamtæ emkaam wow pynchongñia yi leh kani ka sorkar chwa wow jied ya ki MLA neibhah ha kani ka sorkar da sakhi yeiwa thiah kiwa sikai ha sarok du nei wym yoh tulop ki.
Chooh chooh da ong u wa ha JHADC dang sahteiñ chiboon ka bhah yong ka heiwa da dooh tulop kiwa kreh wei lym lai ka seiñ kiwa kreh yong ka da ka mukotduma tæ ym yoh poisa ka Council wei hadooh katni leh dang boon bnai wa sah ka tulop kiwa kreh ka Council.
Heijooh i por da ong u wa hanla phah ka Kasari leh ka sorkar ympu pynlait ko ya ka poisa hadooh katni.
Kamtæ u Brightstar da kyntu u ya waroh wow wanrah ya u Andrew wow poi u ha i thong wa jop ha kani ka kynti.
