Ka Mukhla Pyllun Fishing Association da pyntip ko wa da em ki damok kiwa da choh dawai ha ka wah Myntang ha ki bynta wa em hapoh ka yingkieñ wow lai cha Myrjai heiwa da chem ki bru ya boon ki dakha wa yap heiwa da jied pynlang ki ki leh wei da em leh kiwa rah cha yung yow baam.
Ini da jia ha ka miet ka 2 tarik uni u bnai deiwa theh da i dawai Tutia katkam wa chem ka seiñ, kawa da ong leh wa na ki por cha ki por khamtam ha kini ki por tlang neidaw wa stang um da leh ki bru yeini, wei chwa ini leh da em wa choh dawai ha Bampyrthap ka um wa em nadien ka yung krehkaam ka BDO Thadlaskein ha ka 1 tarik u bnai nyngkong heiwa da yap lut waroh ki doh-um.
Ka seiñ da ong ko wa hanla da maham ko na i por cha i por ya kam kini ki kaam leh pynsih, leh dusmon tangwa ki bru dang leh bait ki yeini.
Kamtæ ka Association da maham joor ko ya kini ki damok wa lada chem daw pynkem chi syndon wei daw e cha ki bor sorkar, heijooh i por da ong leh wa da em kiwa suba wa emkti da ki kattu katni ngut ki bru kiwa leh ya ini i kaam wei neiliang ka seiñ dang booddien ko.
Ka Mukhla Pyllun Fishing Association da khut kyrpaad lang ko ya ki chnong wa marjan wa ki para wa khwe wow ya krehlang yow pynim pynroi ya ki doh-um ha tymbud ka wah Myntang. Da pynkynmoo leh wym cha u pam dieñ wei tih moo leh ha rood ka wah Myntang.