U George Lyngdoh uwa man u kyrtong ka Meghalaya Trinamool Congress na Umroi Constituency, ynnin ka sngi deilang wa ki lok kyrtong yong oo na kiwi ki Constituency da lai pynskem u pynyaoo hi kam u kyrtong ka TMC na Umroi deiwa lai thap pyrtuid haphrang ki Returning Officer ha Nongpoh.
Hawa yaklam wa kiwa pathai khubor, u George da sñiawngooh u ya ki paidbah ka Umroi wa da e laad ki ya oo kam uwa mihkhmat cha ka yung dorbar chna aiñ ka jylla ha kini ki 5 snem wa da dep, deiwa ong leh wa ha kani ka samoi da yoh u wow wanrah chiboon i kylla hapoh ka Constituency wei dang em leh kiwa dang sahteiñ.
Da ong u leh wa i mih noh u na ka Congress toh hadien i syllok wa ki waheh wasian wei katkam wa man i long hapoh jylla. Da ong u leh wa i yoh kyrtong ka TMC haki 54 tylli ki Constituency pynyoo i wa ki paidbah chaniah ki ya ka seiñ kawa skem ha ki yurim ymtoh du i ktien donhi.
Chooh chooh da ong u wa heipor Lockdown ym em wa wan chakhmat wow yarap ya ki manyung wa chem chitom wei katni heipor wow jied ya kiwa mihkhmat da ong u wa ka Ri-Bhoi hi waroh kawi tip ko yeiwa leh kiwi ki seiñ, heiwa man ki thlu yung da saam da ki kymmor wei wow pynpoi ya ka song poisa wa T. 5,000 wei hajrong kani ka yurim mut ki wow thied ya ki paidbah wei sñiawsih toh wa mut ki wow paar tooh chapoh i pyrkhat pyrdaiñ ki bru wow thied ya ka mynried wa ka yurim ka Ri-Bhoi District.
