I pynkhreh jied MLA na waroh ki Constituency hapoh ka jylla da lai i chaphrang wei da sakhi leh ya kiwa boon ki kyrtong kiwa thap pyrtuid na ki Constituency waphær waphær kamjooh ki yalang ki seiñ wa da pynman har rukom.
Ha kini ki sngi wa dadep hawa kylli na u Montri Rangbah ka jylla uwa man leh u National President ka NPP, u Conrad Sangma heiyatoh wa u MLA ka Jowai, u Wailadmiki Shylla hajrong i chakri yong oo ha kini ki san snem wa da lai.
Neiliang u Conrad da ong u wa u Wailadmiki man u u bru uwa kreh chitom wei uwa em sap kam uwa mihkhmat paidbah.
Da ong u leh wa man u u bru wa yoh u yaklam wei ym jooh rap chem kam uni u bru uwa yaichah bait wei wow pteiñ u booddien ya ki kaam wow myntoi paidbah.
Da ong u leh wa u Wailadmiki da man u u bru uwa da kreh chitom bha neibynta ki paidbah ka Constituency wei i kreh chitom yong oo da ye wow wanrah yei kylla ha kiwa boon rukom wei embynta bha u ha i kylla hapoh ka Constituency.
U Conrad da kyntu u leh ya ki paidbah wow kyrchaan ki ya u Wailadmiki ha kani ka kynti.
