U kyrtong ka TMC na 2-Jowai Constituency, u Awhai Andrew Shullai ynne da wan u wow thap pyrtuid ha yung krehkaam u DC ha Jowai yow yakhun ya kani ka Election MLA 2023 deiwa emlang kiwa boon wa kyrchaan.
Hawa yaklam wa kiwa thoh khubor, u Andrew da ong u wa ha u 2018 da yaleh u syndet syndet wei kiwon kiwon ki kaam wa leh syndet man ki kamtu tangwa dei sñiaw maya ya ka Constituency wym toh u chah lehbieñ ko hadooh kat deini, ym toh wow e u bichaar da ka spah yei hok, da wan thap pyrtuid u yow yieñ neibynta ki khon ki nat wa ka mynried ka Constituency.
Da ong u leh wa hapoh ka Constituency da hiar ka yoh ka kot kylleiñ kyllieñ neidaw i rukom krehkaam ka sorkar kawa katni heiwa da kamai da ki kattu katni donhi ki bru wei ym em poisa de ha ki yaaw ki haat.
Da kdaw u leh ya ki kreh kiwa dang sahteiñ nadooh u 2017 kiwa da biang lut waroh i jait kam ka Maternity & Child Hospital wa em ha Panaliar, Jowai ka B.Ed College ha Jowai kawa da dep u chna kiwa sah sa du u pynkrehkaam donhi, ka Iawmusiang leh kawa dang sah khlem chna wa i kaam wa yatoh wa i jhep wa du neidaw wa rhah spah kiwa mihkhmat paidbah da thooh thaw ki chawi wei iwa rim leh dooh wei i thymme leh ym yoh tæ jinjar ki paidbah.
Da ong u leh wa kani ka sorkar toh du hei booh mooyurim khlem ye u pynkrehkaam wei kamwa ong u Symbood Montri sorkar wa toh ka sorkar pynbiej, kamtæ da ong u wa ki bru wa chong chnong ka Jowai toh kiwa chemphang kiwa pyrkhat ya ka mynried wei ini wa dep da chah pynbiej wei ka Jowai Constituency daw e ko yei kyrchaan ya oo kam u kyrtong ka TMC.
Da ong u leh wa oo toh u kyrtong u wym em pynyieñ da kawon kawon ka chnong wei ha u 2018 da yoh u duna 9000 tylli ki Vote deiwa yieñ syndet wei oo man u kam u tre chnong yong kawon kawon ka chnong khlem pait chilliang ya uwon uwon kamtæ ha kani ka kynti deiwa yoh u pynkhreh bha, ka Vote wa daw yoh u leh yooluti wa daw ku da ar chah.
