U kyrtong ka UDP na 2-Jowai Constituency, u Moonlight Pariat ynne da wan u wow thap pyrtuid ha yung krehkaam u DC, Jowai deiwa emlang kiwa boon bha ki paaid wa kyrchaan ya oo.
Hawa yaklam wa kiwa thoh khubor, neiliang u Moonlight Pariat da ong u wa u kreh u yow pyndooh yei liat tooh ka poisa wa toh u lai cha ka sorkar kawa toh u lai cha ka District Council, ka wa ar won u pyrchang u pynkylla ya ka Education Policy heiwa ki khynnah hadooh 14 snem u yoh ki wow lai skur dei mynkna yow lait u pynlutsan ya ki bei ki pa.
Ya ka Iawmusiang u pyndep u chna deiwa thooh poisa na kiwi ki Scheme ka sorkar jylla, deiwa ong u wa kamwa pyrkhat u wa ka poisa wa toh u yoh na ka DoNER toh kawa ym yoh de (Lapse).
Sa kawi toh wow pyndep ya ka thaw noh jhep neibhah ym toh iwa suk ya kiwa chong chnong u sah u thiah ki wa i jhep wei lada poi hei thong jop, hapoh 6 bnai u yaklam biang wa ki 5-6 chnong wa em hajan ka thaw noh jhep ha Mynkjai deilang wa ka District Council yow kær ya ini i thaw dei miat wei wow chna ya ka tyndur (Furnace) yow yoh u thang ya i jhep wei ya kiwi ki jhep won yow pynchna sboh ki deiwa booh da ka Compost Plant yow pynkylla poisa yei jhep.
U thooh laad u leh wow yarap ya kiwa dooh wa duk wa em hapoh ka Constituency ki wym yoh Card Rachon yow yoh ki ya u khoo sorkar wa mynkna.
Da ong u leh u pynkrehkaam leh ya ka Scheme sorkar pyrdi yow chna yung ya kiwa dooh wa duk kam ka PMAY Scheme kiwa ye wow pynyoh yung cha ki spah ngut kiwa dooh wa duk.
Sa kawi won ka thong toh wow chna sarok soodong ka chnong Jowai yow pynkyllooid neibhah katni yow lai na Khimusniang cha Mihmyntdu da chimpor da ki kynta wei ka UDP da em iwa pynkreh ko kammon wow leh yeini.
Heiyatoh waka umbaam da ong u wa da em ka JJM tangwa daw thooh chooh ki laad wow pynbiang um ha man ki thlu yung yow lait nei lai thooh um na jngai.
Ya ki khynroo khyllood kiwa ym yoh kreh hadien wa ki bei ki pa da pynlut ki da ki lak , da ong u wa ka TMC da kular ko 3 lak tylli ki kreh, ka NPP 5 lak tylli ki kreh tangwa neiliang u Moonlight da ong u wa du ki kreh sorkar da em palat 10,000 tylli ki wym em khut Advertisement wei lada ye u pyndap ya kini leh da boon kiwa yoh myntoi wei kiwi ki kular toh du wow pynbiej paidbah donhi man ka 5 snem wei kamwa ong u Prestone Tynsong ki paidbah leh ngait bait ki man ka san snem, kamtæ da ong u wa ini i biej toh u pynkut noh ki.
Da ong u leh wa ka UDP i klular toh wow pyndap chwa du ya kini ki 10,000 tylli ki kreh sorkar wa da lait deiwa pynbna Advertise smat yow khut kreh.
Hajrong u sarok da ong u wa katni da pyrchang ki wow biah-ja ha sor Jowai, deiwa e nongmuna ya u saork ha Mihmyntdu uwa tang chi bnai leh ym em da siang ya u sarok uwa khlaad na Highway chapoh chnong, da pra wot u wei ini pynyoo wa ki Contractor ym em bood kyndon ki.
Kamtæ da kyntu u ya ki paidbah wym toh u pynsepai ya ka Vote deiwa ya krehlang neibynta ka mynried ka jaitbru wa maya yong i neibhah ha ki 5 snem wa da lai, ka Jowai Constituency da em ko hei dooh kyrmen wym yahaap wa iwa da kular ha u 2018 kiwa heh wa kmai tangwa manda kut ka 5 snem waroh sepai.
“Ki paidbah wa chong chnong ka 2-Jowai Constituency, sñiawbha e laad ya nga u chakri ya phi ha kini ki 5 snem deiwa hok deiwa burom khang wa waroh kiwa angnood wa kular ye u pyndep ha ki 5 snem,” booh u Moonlight i kyrpaad ha ki paidbah deiwa pynrap wa ye hi u pyndep ya kini waroh ha ki 5 snem kam u bru uwa da em ha ini i kaam da slem.
