Ynne ka sngi da wan thap pyrtuid uwi u khynroo, u Generous Paslein kam u kyrtong samen na Nartiang Constituency wow yakhun ha ka Election MLA 2023.
Hadien wa dep thap pyrtuid hawa yaklam wa kiwa pathai khubor, u Generous da ong u wa kam u khynroo chynna jngai u wa toh u kyntu kynrong ya ka thaaiñ neibhah wa man ko kawa da sahdien bha.
Da ong u leh wa hapoh ka Constituency duna bha i yoh khih yoh kreh ki khynroo kiwa da em i stat i tip katwa kamtæ daw thooh u ya ki laad ki luti neibynta kiwa da chah hikai (Skilled) khnang wow yoh kreh ki kamjooh leh u thooh ki laad ya kiwa ympu em chah hikai.
Heiyatoh wa i rep i riang da ong u wa emkaam bha wow kyntu ya i rep i riang.
Da ong u wa ki thaw uiñke suwari neiliang ka chnat ym em u pynmiat ko ya ki hadooh katni.
Kamjooh leh da ong u wa ym em wa kyntu kynrong ya ki yaaw ki haat cha kani ka thaaiñ wei ym em leh wa pait ya ki.
U Generous da ong u leh wa ka Nartiang Constituency man ko kawa sahdien tam na waroh ki 7 Constituency ka Ri-loom Jaiñtia la hei chait i khiah, i puræ puthi, i yalehke Sports wei angnood u nadooh na mynsien wow ku ka thaaiñ wow pynyoo ka nuksa deiwa e laad ki paidbah ya oo wow wanrah yei kylla.
