Ynne ka sngi, u Lahkmen Rymbui, MLA ka 7-Amlarem Constituency ha kini ki 5 snem wadep wei uwa man leh kam u Montri kaam pohyung ka sorkar jylla, ka chnat pure puthi wa kiwi de da li thap pyrtuid u ha yung krehkaam Amlarem Civil Sub-Division Officer kam u kyrtong ka UDP chirup i synraan ki paaid wa boon yong oo kynthai wa chynrang.
Hei yaklam wa u Lahkmen Rymbui hadien wa dep thap pyrtuid da ong u, “I im yong u bru toh i lai luti, iyi wada biang katni wym toh iwa da dap pura, tæ kam ki bru chiboon i emkaam dang dawa na kawi ka por cha kawi won wei ki 5 snem wada lai toh ki snem yong i kyrkhu haka Constituency wa ya u paidbah”.
Kamtæ da ong u wa i man kam uwa mihkmat leh toh i lai luti heiwa iyi wada biang u nangpynbiang chooh chooh, wei nang pynbha chooh chooh, katæ toh i angnood kiwa mihkhmat kamjooh ki paidbah khnang wa i roi i paar u man ko salonsar.
Hawa kylli yei sur u paidbah lyngba i lai luti yong oo ha kani ka kynti hanla boon i chah pynbaad u ha ki sngi chadien, ong u, “Ki bru ye ki u pynbaad u yaroh, tang hawa leh ya kawon kawon ka kaam nadooh mynsien neibynta i myntoi u paidbah, i kyrkhu wan ko na u Blai wei u Blai uwa yoo theh u yei kyrkhu”.
Wei hei lai luti yong oo hadooh kini ki sngi, ong u wa dap du i kyrkhu wei ki paidbah leh chynna ki wa yatoh bhah ki wa oo neibynta u yakrehlang chirup chirup yei bha i miat ka imlang sahlang.
