U Alban K. Gashnga naka chnong Lamin, West Jaiñtia Hills District, hadien wa dep thap pyrtuid kam u kyrtong ka TMC neibynta wow yakhun yaka Election MLA naka 7-Amlarem Constituency ynne ka sngi ha yung krehkaam ka Amlarem Sub-Divisional Office, da khana u yei daw wa pynman ya oo u yakhun Election na kani ka Constituency toh wa yoo u yei emkaam u kylla ka synchaar khadar.
Ong u kiwa mihkhmat wada lai chadien toh kiwa krehkaam bait hei luti yong warim, itæ toh deiwa saam Grant wei e kreh Contract ya uwi næ ar ngut ki bru haka chnong wa heh Vote.
Kamtæ oo won kwah u wow pynlai yumut kammon u thooh ki laad chna khih ya kiwa puræ wa ki wym em puræ, u pynmih yaka yarong poisa næ ka laad yoh khih yoh kreh lyngba ka spah rymaw wa em haka thaaiñ.
Heiyatoh wa i stad i tip ong u, ki phaw snem da lai ki kamtæ emkaam yei kylla itæ toh deiwa yoh yaka Quality Education wym du u chna donhi yaki skur khang yow ye u yakob wa ki bru cha baar wada rap ku hei stat i tip.
U thooh laad u yow pynyoh ki laad e sumaar wa paka ya kiwa dooh wa duk, neibhah ong u katkam i lai luti yong oo boon kiwa hun u thiah yap du neidaw wym kot bor u chah sumaar haki thaw sumaar wa stat.
Neitæ kular u leh wow pynbiang ki umbaam umdih, u pynyoh ka puræ puthi wa paka ya waroh ki khynnah nadooh kiwa dang khian hadooh kiwa da heh.
