U kyrtong ka NPP na 2-Jowai Constituency uwa man leh kam u MLA wa katni, u Wailadmiki Shylla ynne da wan u wow thap pyrtuid yow yakhun wei wow yaleh u ksoh biang yei man kam uwa mihkhmat.
Ha ini i wan thap pyrtuid u Wailad, da wan ki hajar ngut kiwa kyrchaan ya oo yow lai synraan ya oo cha ka yung krehkkam u DC ha Jowai.
Hadien wa thap pyrtuid, neiliang u Wailad hawa yaklam wa kiwa thoh khubor hawa kylli iyi i daw wan pynyoo ki bru yei kyrchaan ya oo, da ong u wa i daw hi toh i maya deiwa yajan wa ki paidbah wei deiwa sñiawthooh yei eh i khoo yong ki paidbah wei ki paidbah e ki yei kyrchaan ya oo wei da yoo ki leh wa oo toh uwa kreh chitom wei yeiwa da pyrchang yong oo ha kini ki 5 snem.
Da ong u leh wa ha ki 5 snem wa da lai da ye wow pyndep ya kiwa da sahteiñ kam ka Umngot Water Supply Scheme kawa da sah da 20 snem khlem pyndep.
Heiyatoh waka Iawmusing Shopping Complex kawa da angnood ym du kiwa chong chnong ka Jowai tangwa da waroh hi ka Ri-loom Jaiñtia, da ong u wa kam u MLA deiwa yarap ka sorkar da yoh wow sdang chipor tangwa neidaw wym kwah u Contractor wow pteiñ yei kreh kamtæ da khut Tender deiwi wei oo kam u MLA da ye u wow wanrah ya ka poisa yow kreh pyndep tangwa uni u Contractor won da lai u cha ka yung bichaar da ka mukotduma wei kani katni dang em ko hapoh i bichaar.
Heiyatoh wa ka B.Ed College ha Jowai da ong u wa da booddien u leh yeini tangwa ka sorkar pyrdi da pynmih ko ki kyndon wa ym ye de u wai ya ka B.Ed College kiwa man kam ki Stand Alone College emkaam wow man ko kam ka B.A. wa B.Ed College wei yow pynkhun ya kini ki kyndon dang pynkreh wei da lai chakhmat tangwa neidaw wa em ka klam COVID-19 ar snem tæ sahkut noh ini deiwa pynrap wa lada ym em poi ka Election, ha kini ki bnai da toh u yoh noh ya ka B.Ed College.
Heiyatoh wa i jhep, da kylli u wa iyi wa da em wa leh 28 snem nachwa ya ini i kaam, kamtæ da kyntu u ya ki paidbah wow man kiwa yaichah wei lada ym toh em ka khlam ha ki ar snem da ye wow pynbait ya ini i kaam. Kamtæ da kylli u ya kitu kiwi ki lok iyi leh ki la 28 snem heiyatoh wa ini wei oo won lada e laad ki bru sa san snem deiwa skem daw ye u wow pynbait ya ini i kaam. Da e nongmuna u leh wa oo da ye u wow pyrchang pynim biang ya ka Jowai Municipal Board heiwa katni da em ko boon jait i emkaam wei da biang leh i su tulop na ka sorkar.
Heiyatoh wa ka Maternity & Child Hospital wa em ha Jowai, kawa da pynbaad kiwa boon toh kawa da wai tangdep hi-eh, da ong u wa kani toh kawa da dep chna nadooh u snem 2017 tangwa ym em wai ki ka, wei oo ym em kwah u wa kani ka Hospital u sahkut ko khlem wai, kamtæ da pynbor u ya ka sorkar wow pynkrehkaam ka wei da wai ya ka wei hadien ini da thung kreh ya ki Doctor wei ha kini ki sngi wow wan daw man ko kawa krehkaam pura wei kamwa man kattæ leh da man ko kawa krehkaam kajiak neibhah lada pynslem u wai daw pyndooh myntoi ko ya u paidbah wei ha kini ki chi bnai ar bnai da man ko kawa krehkaam pura.
Hawa kylli chooh chooh da ong u wa ka Jowai Constituency lada pait chadien ym jooh pynjop ko du chisien neibhah ka tip ko wa ym ye u pyndep yei kaam du chisien donhi. Da pynkynmoo u leh wa ka Jowai Constituency ka da thap Vote bait ko cha utu uwa em ha ka sorkar wei sñiawskem u wa ki paidbah daw e ki yei kyrchaan kamwa da yoo phi ki bru kiwa da wan e yei kyrchaan kamjooh ya ka Party yow chna sorkar.
