Uwa yahkhmat ka BJP uwa man leh u MLA ka South Shillong, u Sanbor Shullai da pynsñiaw u yei wym yahaap yei kam u AL Hek wow man u kam u Montri Rangbah lada ka BJP u yoh ko wow yahkhmat ya ka sorkar ha kani ka jylla.
U Hek uwa man kam u MLA ka BJP na Pynthorumkhrah da ong u wa daw em noh ka ‘Double Engine Sarkar’ namo ka sorkar ar Engine ha Delhi wa ha Meghalaya, katæ ha Delhi toh ka yong ka Modi Sarkar wei ha Meghalaya leh u man ka Modi Sarkar, tangwa ha Meghalaya u AL Hek u man Chief Minister.
Hawa kylli hajrong ini i klam u Hek, neiliang u Sanbor da ong u wa u Hek ym ye u wow put turoi ya idæ wow man kam u Chief Minister lada jop, neibhah ka BJP toh ka National Party wei ym toh ka yong u Hek samen.
Da ong u wa kamwa da leh ha i por wa e chuki Minister lada em itæ i phah wow chimkti ya ka chuki u chim bait u, deiwa pynrap wa lada na Delhi ki yoobiang ki ya oo wow man Chief Minister, oo smat u wow chakri ya ka jylla.
Hawa yatoh wa i pynbaad pyrchah ya ka BJP da ki seiñ kiwa yakhun ha kani ka Election, u Sanbor da ong u wa ki Party kiwa em ha ka MDA, chwa ka Election waroh pynbaad ki ya ka BJP tangwa manda dep Election ong ki ya ka BJP bhai bhai neibhah emkaam ki ya ka poisa na Delhi, na itæ i daw da chna sorkar wa ka BJP bhai bhai, wei da pynrap u ini toh i rukom yong ki.
Da ong chooh chooh u wa ha ka Election 2018 leh i jooh i pynbaad ya ka BJP wei hadien ka Election won kdung ki ya ka BJP bhai bhai neibhah i dud i umngap toh na Delhi.
