U MLA ka Mawkynrew uwa man leh u kyrtong ka PDF, u Banteidor Lyngdoh da ong u wa ka NPP kawa yakhun pyrchah ya oo ha kani ka Election ym em de ko da kawi ka laad ka luti wow pynbaad ya oo, lait noh deiwa pynbaad wa oo lai booh mooyurim u khlem i kreh, wei da ong u wa hawa yatoh wa ki PHC wa CHC, kini toh kiwa da yoh bor namo ka Administrative Approval.
Hawa yatoh wa iwa ong u wa chah tyrwa poisa, da ong u wa oo ym toh u bru wa chah chah thied, deiwa pynrap wa lada chah thied u kammon u yaleh Election wei daw man hi-eh u kam uwa chah hukum uwa kohngooh, kamtæ da ong u wa hadooh katni da yieñ bait u ha ka yurim wa em u.
Hawa yatoh wa i e laad biang wow rep da ka dawai sboh ‘Urea’ da ong u wa ka dawai toh kawa da em katni, tangwa ha i por Election neidaw wym em bien u yaleh na ka seiñ yong ki, da pyrchang ki wow pynrem, tangwa lada toh wa bien u yaleh na ki, daw ong ki wa u Banteidor uwa biang wa bha.
U Banteidor uwa da lai thap pyrtuid ynnin ka sngi da pynsñiaw u yei sñiawskem wa ki paidbah daw jied biang ki ya oo kam u MLA ha kani ka kynti, neibhah ki paidbah da yoo ki ya i kaam wa da kreh u wei da yoo ki leh yei kylla.
Ha kani ka sngi najrong u Banteidor da emlang leh kiwi ki kyrtong ka PDF wa kynthup ya u Auspicious Lyngdoh, u kyrtong na Mawphlang wa u Egenstar Kurkalang uwa man u kyrtong na Nongkrem ha kani ka Election.
