Ka High Court ka Meghalaya da pynkut noh ko ya ka mukotduma pyrchah ya u kyrtong ka NPP na Mawlai, u Teiborlang Pathaw, wei hadien wa da yoh ya ka rai na ka yung bichaar, neiliang u Teiborlang da lai u wow pyntip leh cha ka Returning Officer ynne hi ka sngi.
Ini i lai u Teiborlang wow pyntip cha ki bor pynlai Election hajrong i wym em de ka mukotduma toh wa hadien wa ki kyndon yong ka Election Commission of India da phah ko ya ki seiñ saaiñpyrthai wow pynbna paidbah ya ki kyrtong kiwa em mukotduma, wei lyngba i pyntip noh cha ki bor pynlai Election ym mut wa u kyrtong ka NPP na Mawlai da khooid u na waroh ki chah pynbaad na ka mukotduma hachwa yong ka Election.
“Nga wan O wow pyntip cha ka Returning Officer ynne wa nga ym em mukotduma de kamwa da pynbna hachwa, hadien wa ka yung bichaar wa emburom da pynlait ko ya nga na kani ka mukotduma,” da ong u.
Katkam wa khana u Teiborlang Pathaw, kani toh ka mukotduma hajrong ka Employee Provident Fund (EPF) yong ki wakreh ha i por wa dang pynlai u ya kawi ka Agency.
“Kani ka mukotduma toh kawa nadooh u snem 2017, heiwa da pynbaad wa em i bakla heiyatoh wa ka rukom su ya ka EPF yong ki wakreh, wei ini toh i ya pynbait wa ka yung krehkaam wa pait ya ka EPF wei neiliang yong i da dep su ya kawa toh u su kamwa da phah nadooh u snem 2018,” da khana u Teiborlang wei da pynrap wa i slem won wow bichaar ya kani ka mukotduma toh neidaw i wan noh ka khlam COVID-19 heiwa yei bichaar da ye wow pyndep noh wei da e ka rai ha ka 10 tarik uni u bnai.
Da ong u leh wa ini toh i jop wa khroo ya oo khamtam ha ini i por wa ki kyrtong wa yaleh pyrchah ha ka Election da yoh ki wow klam boon jait hajrong ka mukotduma.
“Neidaw wa ka High Court wa emburom da pynkut ko ya kani ka mukotduma wei nga ym em leh O iyi iyi wa bakla, nga kyrpaad O ya ki paralok wa yakhun pyrchah wow sñiawthooh ki ya ini, wei katkam ka kyndon Model Code of Conduct lada pynbaad khlem tip ye wow lai kylla ka ujor pyrchah ya kiwa pynbaad,” da ong u Teiborlang wei da pynrap chooh chooh wa lada dang pteiñ ki wow pynbaad hadien kani ka rai yong ka yung bichaar, daw leh u deiwa khor.
